Конечно правдата излезе на виделина. Поминав низ долго патешествие. Реков дека тоа е политички монтиран процес од страна на урбано – политичка бизнис спрега, вели за „Слободен печат“ Максим Димитриевски, градоначалникот на Куманово и претседател на ЗНАМ, партија која е дел од владејачката коалиција и кој цели кон уште еден градоначалнички мандат, откако вчера беше соопштено дека Обвинителството се откажало од обвинението против него пред кумановскиот суд.

-Пред претседателските избори во 2024 година реков дека тоа е политички монтиран процес од страна на урбано-политичка бизнис спрега позната во општината. Бранев јавен интерес и тогаш и сега ги застапувам интересите на граѓаните. Како човек кој верува во институции и малкуте професионалци кои ги има во нив, а во овој случај и во узурпираниот обвинителско – правосуден систем, поминав низ долго патешествие и присуствував на секое рочиште пред судот. Во таа судска постапка беа презентирани многу факти и аргументи во форма на докази од мојот адвокатски тим кои ги побија обвинувањата и потврдија дека сум работел по закон во заштита на јавниот интерес. Правдата победи! Трошоците на постапката ќе бидат надоместени според закон, а јас во иднина ќе информирам за моите понатамошни правни дејствија – вели Димитриевски за „Слободен печат“.

Кумановското обвинителство го гонеше Димитриевски за злоупотреба на службената положба и овластување, по пријава поднесена од две кумановски градежни фирми за случајот за недобивање дозволи за градење згради во Куманово..

„Основниот суд Куманово, заради интерес на јавноста за постапката по предметот на Основен суд Куманово К-115/24 против обвинетиот М. Д. од К. за кривично дело злоупотреба на службената положба и овластување од чл.353 ст.4 в.в. со ст.1 од КЗ, известува дека на ден 01.07.2025 година донесена е пресуда со која обвинението се одбива согласно на чл.402 ст.1 т.3 од ЗКП, затоа што јавниот обвинител со поднесок од ден 30.06.2025 година се откажа од обвинението“, стои во соопштението на сајтот на судот.

Последното рочиште за процесот се одржа пред неколку дена, односно на 27 јуни, а за 4 јули требаше да се одржат завршните зборови за предметот.

Според обвинението кое се водеше против него, Димитриевски не постапил согласно законските обврски од Законот за градење, односно по комплетирање на документацијата и добивање позитивно мислење за градежни дозволи, не им доставил на фирмите известување со пресметка за плаќање надоместок за уредување на градежно земјиште. Со тоа, според обвинителството, им била нанесена значителна имотна штета во износ од 3.351.800 денари (околу 55.000 евра).