Како повеќето централни банки низ светот, така и Европската Централна Банка (ЕЦБ) веќе некое време размислува за воведување на дигитална валута.

Откако лани одржа неколку јавни консултации и ги слушна мислењата на земјите-членки за ова прашање, ЕЦБ во моментов работи на оптималниот дизајн кој би го имал дигиталното евро, пишува Еуобсервер.

Без разлика како ќе изгледа финалниот продукт, дигиталното евро целосно би го надополнило готовинското плаќање преку обезбедување дигитална алтернатива.

Според експертите, дигиталната валута би била од корист за сите. Како што пишува Еуобсервер, најпрво, доколку се усвои, дигиталното евро би претставувало огромен чекор напред кога станува збор за прекуграничните плаќања, со што меѓународните трансфери на пари ќе бидат побрзи, помалку скапи и потранспарентни.

Покрај ова, дигиталната валута би понудила полесен начин за поединците и фирмите да ги вршат своите дигитални плаќања, односно би служело како алтернативно средство за плаќање на трансакции на мало.

Експертите сметаат дека дигиталното евро нема да ги замени физичките валути. Од ЕЦБ наведуваат дека тоа би било наменето само како алтернативно средство за плаќање за рутински трансакции на мало во секојдневниот живот, а не како инструмент за финансиски инвестиции.

Огромни предизвици

Причината зашто дигиталното евро се уште не е пуштено во употреба е во главно поради низата предизвици со кои би се соочила ЕЦБ. На пример, едно нивно неодамнешно истражување ги посочи сигурноста и безбедноста како клучни проблеми.

Ова значи дека, во најмала рака, би биле потребни цврсти мерки против измамата и хакирањето, како и безбедни методи за автентичноста на плаќањето, како што се биометриските методи на проверка на плаќањето.

Од техничка гледна точка, креаторите на политиките експериментираат со различни пристапи и технологии, вклучувајќи и „централизирани“ и „децентрализирани“ решенија.

Две верзии

Во еврозоната во моментов се разгледуваат две верзии: „онлајн верзија“, која ќе овозможи плаќањата да се вршат преку трето лице и „офлајн верзија“ во која плаќањата би се вршеле директно од лице до лице.

Неодамнешната консултација – која заврши на 16 јуни 2022 година – беше првиот чекор на Брисел кон воведување некакво законодавство за дигиталното евро. Од законодавна гледна точка, усвојувањето на дигитално евро особено ќе бара закони во области како што се приватноста и спречување на перењето пари.

Во октомври 2023 година се очекува управниот совет да одлучи дали да премине во следната фаза, која се очекува да трае околу три години.

Сите централни банки имаат мандат да ја одржуваат вредноста на нивната домашна валута, и во физичка и во дигитална форма.

Затоа, креаторите на политиките на ЕУ треба да усвојат мултилатерален пристап кон дигиталната валута, со тесна координација и соработка со нивните колеги во другите земји, земајќи ги предвид импликациите од усвојувањето дигитална валута за сите вклучени засегнати страни.