Шон „Диди“ Комбс минатата недела се врати во Метрополитен притворниот центар во Бруклин, каде што, според изјавата на неговиот адвокат Марк Ангифило за агенцијата „Асошиејтед прес“, бил дочекан со овации од страна на другите затвореници.

Жири-комисијата на 2 јули го прогласи Комбс за виновен по две точки од обвинението поврзани со проституција, но го ослободи од обвиненијата за здружување во криминална организација и трговија со луѓе, дела кои можеа да го осудат на доживотен затвор. Пресудата беше донесена по седумнеделно судење на кое сведочеа 34 лица, меѓу кои и негови поранешни партнерки и деловни соработници. Комбс останува во притвор и му се заканува казна до 20 години затвор.

Ангифило изјави дека уште во март 2024, по претресот на домот на Комбс од страна на федералните власти, го предупредил дека може да биде уапсен поради сомнеж за трговија со луѓе.

„Му реков: ‘Можеби твојата судбина е да бидеш оној што победува. Луѓето мора да видат дека е можно да се победи. Мислам дека тоа длабоко го погоди’“, рече адвокатот.

Тој додаде дека нивниот правен тим свесно решил да се соочи со обвинувањата за насилство врз поранешни партнерки и вработени.

„Насилството беше очигледно и отворено, и знаевме дека обвинителството ќе се обиде да го поврзе со трговија со луѓе. Затоа моравме веднаш да објасниме што всушност се случувало“, објасни тој.

Адвокатот раскажа и дека се разбудил рано на денот на пресудата и им рекол на колегите да подготват барање за пуштање на слобода со кауција.

„Ќе добиеме поволна пресуда, но мислам дека ќе го осудат за проституција – да се обидеме да го извлечеме“, им порачал.

Ангифило е експерт за законите за организиран криминал во Њујорк, кои и сам ги помогнал да се прошират додека пред 20 години работел како федерален обвинител.

„Ги знам слабите точки на законот. Тој функционира механички. Ако знаеш како функционира ‘автомобилот’, знаеш и каде може да се расипе“, рече тој.

Според негово мислење, обвинителството имало „десетици слаби точки“ кои го урнале случајот.

„Немаа докази за здружување. Едноставно, не постоеше. Практично зедоа делови од приватниот живот на Комбс и се обидоа околу неговите лични асистенти да изградат обвинение за организиран криминал“, заклучи адвокатот.

За време на судењето што започна во мај, обвинителите испрашале вкупно 34 сведоци во текот на 29 дена. Меѓу нив била и Касандра „Каси“ Вентура, поранешна партнерка на Шон „Диди“ Комбс, со која бил во врска 11 години.

Тие се обиделе да докажат дека Вентура (38) била принудена да учествува во таканаречени „фрик оф“ сесии – сексуални перформанси со машки сексуални работници.

Адокатите на Комбс тврдеа дека сите сексуални односи биле доброволни, а како доказ приложиле и СМС-пораки за кои сметале дека тоа го потврдуваат.

Иако Комбс беше ослободен од најтешките обвиненија, и натаму се соочува со десетици граѓански тужби од лица кои го обвинуваат за сексуално злоставување, што значи дека неговите правни проблеми допрва следат.

Судот му одби кауција на Шон „Диди“ Комбс, ослободен од најтешките обвиненија