„Диаверум“, компанијата што обезбедува бубрежна нега за пациентите во земјава, за „Слободен печат“ после поплаките што пристигнаа од пациентите за организирањето на превозот до дијализните центри – велат дека се трудат да обезбедат најдобри можни опции. Пациентите се пожалија дека комбињата со кои патуваат во Скопје, трипати неделно, а кои ги носат на дијализа, не им одговараат и дека такси превозот бил подобра опција за нив, поради различни хендикепи со кои се соочуваат. Меѓу дијализните пациенти има луѓе со оштетен вид или лица во инвалидски колички, без екстремитет, за кои превозот со комбињата предизвикува потешкотии.

 Во сите подружници, превозот е доверен на надворешниот соработник кој е лиценциран за превоз на патници, со цел да се осигура безбедноста и навременоста на транспортот.Повремено добиваме поплаки од пациентите во врска со превозот. Сите поплаки што се реални, конструктивни и применливи, ги разгледуваме со најголемо внимание и преземаме соодветни мерки за подобрување на услугите. Според законската регулатива и договорните обврски со Министерството за здравство, превозот може да го вршат компании кои се лиценцирани за превоз на патници, но не е прецизирано какво треба да биде средството за превоз, туку само дека треба да биде организиран. Водени од нашиот принцип на вистинска грижа за пациентите, секогаш се трудиме да го обезбедиме најдобрите можни опции, велат од „Диаверум“.

Оттаму додаваат дека во минатото нивниот соработник работел со такси компании на територија на град Скопје, но во текот на летото минатата година такси компанијата го откажала договорот со превозникот.

Потоа се обидовме со други такси компании да воспоставиме соработка но не успеавме, бидејќи тие не можат да гарантираат континуиран и навремен превоз на сите пациенти, а за нас тоа е клучно бидејќи пациентите не може да ја пропуштат дијализата, додаваат од „Диаверум“.

Обврската за превоз на пациентите во договорот со Министерството за здравство е дефинирана како организиран превоз од збирно место во општината на живеење на пациентите.

Сепак, Диаверум, во најголем број од случаите, овозможува превоз од и до индивидуалните адреси на пациентите, со цел да им се олесни пристапот. Ова е еден и од индикаторите можеби и зошто понекогаш, во комбинација со стандардниот метеж во сообраќајот, особено во Скопје, пациентите подолго патуваат од и до дијализните центри. При тоа, се зема предвид најоптимална рута на возење. Компанијата нема законска обврска за физичко кревање на пациентите при сместување во возилата, но на пациентите секогаш им е обезбедена соодветна помош при влегување и излегување од возилата, велат оттаму.

Сите возила кои се користат за превоз на пациентите се технички исправни, соодветно регистрирани и во согласност со позитивните законски прописи.

Компанијата која го изведува превозот, впрочем поседува лиценца за превоз на патници кој ја издава соодветен државен орган. Диаверум продолжува да ја спроведува својата мисија водена од принципот дека секој заслужува исполнет живот. Нашиот приоритет е вистинска грижа, а ние ќе продолжиме со унапредување на услугите, вклучително и превозот, за добробит на нашите пациенти, вложувајќи во подобрување на нивното севкупно искуство поврзано со дијализниот третман, се додава во писмениот одговор од „Диаверум“.