Утрово фудбалскиот свет беше погоден од ужасната вест за смртта на фудбалерот на Ливерпул, Диого Жота. Шпанските медиуми набрзо објавија и детали од несреќата во која заедно со Жота загинал и неговиот брат, Андре кој исто така бил фудбалер.

Според информациите, автомобилот излетал од патот, по што се запалил. Огнот потоа се проширил. Ситуацијата била алармантна, а повиците кон службите за итна помош веднаш почнале да пристигнуваат.

„Првичните податоци покажуваат дека Диого Жота и неговиот брат Андре загинале во трагичната несреќа веднаш по полноќ, на автопатот А-52 во областа Сенадиља. Центарот за итни случаи на покраината Кастиља и Леон доби неколку повици за несреќата во која возилото со двајцата млади мажи излетало и се запалило. На терен излегоа единици на сообраќајната цивилна гарда, пожарникари и медицински екипи од Центарот за примарна здравствена заштита во Момбуе, но за жал, докторите можеле само да констатираат смрт“, пренесуваат локалните медиуми.

Тагата е уште поголема затоа што Жота пред само една недела правеше свадба со својата партнерка Рута Кардозо со која има и три деца.

Шок во светскиот фудбал: Почина Диого Жота!