Јован Деспотовски, директорот на Дирекцијата за технолошко индустриски развојни зони (ТИРЗ) и член на СДСМ, преку Фејсбук-статус порача дека е потребна храброст кај врвот на партијата да се прифати реалноста од изборниот пораз. Деспотовски посочува дека не им се потребни условени оставки кои ќе се ефектуираат доколку и другите си поднесат оставки, туку, секој треба да почне од себе без да го чека партискиот другар до него.

-На нашите членови, поддржувачи денес им е повеќе од потребен консолидиран и свесен СДСМ. Сите се тажни, разочарани, но и уплашени од повторување на некои лоши работи од некои не така далечни минати времиња. Силен и реформиран СДСМ може и мора да ги заштити. Силен и реформиран СДСМ ќе биде надеж за сите граѓани. Вчеравечер пропуштивме огромна шанса да го направиме првиот чекор кој почнува со одговорност, со име и презиме,почнувајќи од врвот. По статутот, тоа ќе отвори веднаш простор за поширока анализа на причините за овој пораз, пишува тој.

Деспотовски вели дека за одговор на прашањата: Каде исчезна онаа енергија од пред 7 години? Дали ветивме многу работи а малку исполнивме? Каде се стопи довербата и како се загуби сета онаа надеж кај луѓето?, признанието дека имаат огромен проблем е прв чекор за негово надминување.

– Но, за првиот чекор кон овие одлуки треба само храброст кај врвот да се прифати реалноста на овој пораз. Не ни требаат условени оставки кои ќе се ефектуираат доколку и другите си поднесат оставки. Секој да почне од себе без да го чека партискиот другар до него. Само така овој процес на промена нема де трае предолго а штетата нема да стане ненадоместлива, додава Деспотовски.