Уште 10 студенти од Универзитетот „Свети Климент Охридски“ Битола започнаа со практикантска работа во општинските установи преку проектот „Универзитетска летна пракса“.

По завршувањето на првата и втората група студенти практиканти, кои беа дел од проектот, шестмина студенти во текот на септември ќе извршуваат работни задачи во Општината Битола, еден студент во Јавното претпријатие „Жабени“ и тројца во ОУ „Ѓорѓи Сугарев“.

-Преку вклученоста во работата во јавните општински институции во текот на овој месец, практикантите ќе се стекнат со вештини и знаења кои ќе им помогнат во натамошната кариера, а при тоа за време на нивната работа ќе дадат своја поддршка во работењето на институциите. Практикантите имаат обврски работните задачи да ги извршуваат одговорно и посветено, за што имаат право на месечен паричен надомест за практикантска работа од 10.000 денари во нето износ, како и персонален данок и осигурување од повреда при работа. За овој проект, преку општинската програма за спорт и млади предвидени се 500.000 денари-информираат од Битолската локална самоуправа.

Инаку, проектот Универзитетска летна пракса, Општината Битола го реализира во соработка со Универзитетот „Свети Климент Охридски“, преку Центарот за кариера, алумни и доживотно учење.