Душан Љубисављевиќ – Дуле е роден на 29 мај 1974 година во Штип. Името на музичарот кој ја обележаа македонската музичка сцена во текот на 90-тите и 2000-тите години, пред сè познат како дел од легендарното дуо „Дуле и Коки“, ќе остане вечно впишано во македонската музичка историја.

Музичката кариера ја започнува скромно, заедно со својот другар Никола Јанков – Коки, настапувајќи по штипските кафулиња. Уште како тинејџери го почувствувале пулсот на публиката, а по завршувањето на средното образование, Дуле се сели во Скопје со желба за поголема афирмација.

Големиот пробив на музичката сцена се случува во во 1996 година, кога со песната „Виолина и гитара“ победуваат на реномираниот фестивал „Макфест“. Композицијата, чија музика и текст ги потпишува Александар Митевски, а аранжманот Валентино Скендеровски, станува еден од најголемите евергрини во македонската музика.

Во текот на својата кариера, „Дуле и Коки“ создадоа над 50 композиции, меѓу кои и незаборавните „Мене место не ме фаќа“, „Марама“, „Дај ми шанса“, „Јас сум за тебе“ и други. Песни со кои пораснаа генерации, и кои сè уште се дел од секојдневието – на радијата, семејните прослави, или во моменти на тишина и носталгија.

Во последните месеци од својот живот, Дуле активно работеше на нови песни, кои требаше да бидат дел од нов албум на „Дуле и Коки“. Паралелно, беше посветен на сопствениот ресторан „Доменика“, каде што наоѓаше мир и инспирација.

Душан Љубисављевиќ – Дуле ненадејно почина на 23 септември 2013 година во Скопје, оставајќи зад себе неизмерна празнина, но и богато музичко наследство.

Дуле останува запаметен како скромен човек со големо срце, неповторлив глас и искрена љубов кон музиката. Неговата музика и понатаму живее – како мост меѓу минатото и сегашноста, како сеќавање на едно златно време од македонската естрада.