Бугарскиот вицепремиер за јавен ред и безбедност и технички министер за внатрешни работи Иван Демерџиев по поклонувањето пред гробот на Гоце Делчев во Скопје зборуваше за проблемите меѓу двете земји кои искрснаа денеска.

-Нам ни беше даден термин од 13 часот и 30 минути, дојдовме и направивме се што беше договорено. Му предложив на министерот Спасовски да положиме цвеќе заедно бидејќи мислев дека тоа е правилниот начин затоа што мислам дека апостолот Гоце Делчев заслужува токму такво чествување и се надевам дека на следното чествување тоа и ќе се случи, вели Демерџиев.  

Тој од понеделник најави три генератори за македонските гранични премини кон Бугарија откако разбрал дека снемало струја и  престанал да работи компјутерскиот систем за контрола на патници и возила за влез и излез во РСМ поради кој се направи застој на македонско – бугарската граница и бугарските граѓани со часови не можеа да стигнат во Скопје на чествувањето во црквата Свети Спас, а проверката течела рачно, рече Демерџиев.

-Тие ќе бидат дадени точно за тие три гранични премини за да нема такви проблеми во иднина, Но за жал, разбрав дека проблемите продолжиле и по рачната обработка на докумените. Таквото однесување е неприфатливо. Тоа не соодветствува на заложбите на нашите два народа и нема потреба од вакви, би ги нарекол провокации, рече Демерџиев.

Демерџиев рече дека го советувал бугарскиот европратеник денеска да не доаѓа во Скопје и да не прави провокации, поради што Џамбаски одлучи Гоце Делчев да го чествува на бугарска територија во Благоевград, каде има негов споменик. Исто така го советувал и пратеникот и лидер на Преродба Костадин Костадинов кој со Џамбаски присуствуваа на панихидата за Мара Бунева во јануари во Скопје и ги навредуваа македонските национални чувства.

-Ние не смееме да правиме провокации. Дојдени сме да оддадеме почит, а не да создаваме провокации и тензии. Според мене тоа е правилниот пат. Не смееме да подлегнеме на провокации. Целта на тие провокации е да не разделат. Ние немаме причина да се разделуваме. Ние сме соседи, народи кои традиционално се почитуваат и тоа така треба и да продолжи, истакна бугарскиот министер за внатрешни работи.  

Патот по кој треба да се движат земјите е напред, кон Европа.

-Ние треба да го најдеме патот напред, патот кон обединета Европа. Обединета Евопа претпочита стабилност, заемна доверба и почит. Ние политичарите на двете земји сме должни, да изградиме таква заемна доверба и почит каква што има меѓу народите на двете држави, вели Демерџиев.

Во однос на листата на бугарски државјани на кои денеска им бил забранет влез, а за која претходно Демерџиев рече дека е мошне мала и дали постои можнот за реципроцитет за македонски државјани, нагласи дека Бугарија е држава, која го почитува редот. 

-Кога дојдоа граѓани на Република Северна Македонија на чествување во Благоевград беа пуштени сите да положат цвеќе на спомениците во местата коишто сакаа да ги посетат и јас очекувам реципрочно точно такво однесување од властите на Република Северна Македонија. Очекувам од секој бугарски граѓанин што ќе пристигне да положи цвеќе и да се врати без да има какви било интервенции врз нив, рече тој.

Во врска со тоа како ги коментира изјавите на некои бугарски политичари, дека „Македонија е Бугарија“, тој рече дека Бугарија е првата држава која ја признала Република Северна Македонија и нагласи дека тој нема намера да коментира такви шпекулации.

-За нас е јасно дека Република Северна Македонија е самостојна држава и јас како претставник на бугарската држава се однесувам со целосна почит кон македонската држава и македонскиот народ, рече Демерџиев. 

ФОТО+ВИДЕО: Бугарската делегација се поклони пред гробот на Гоце Делчев