Дијана Иваноска од Тетово со својот талент за комбинација на вкусови нè носи на едно исклучително гастрономско патување.

Дијана стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

Талентираната Дијана денеска ни споделува рецепт – фокача.

– Ароматично лепче кое излезе превкусно. Кромидот се карамелизира додека се пече и заедно со мајчината душица се добива ептен вкусно и миризливо лепче. Најтопло ви препорачувам да го зачувате рецептот и да го пробате – порачува Дијана.

Состојки:

– 300 мл млака вода
– 1 ќесичка сув квасец
– 1 лажица шеќер
– 1 лажиче сол
– 120 мл маслиново масло
– 480 грама брашно (додадете уште малку ако е многу лепливо тестото)
– 2 лажици маслиново масло за одозгора

Додатоци по желба (чери домати, рузмарин, маслинки…)

Подготовка:

* Во помал сад ставете 100 мл од водата со квасецот и малку шеќер. Оставете го 5-10 минути да се активира квасецот.
* Во друг сад измешајте го брашното со шеќерот и солта. Додајте го маслиновото масло, остатокот од водата и смесата со квасецот. Замесете меко тесто. Покријте го со проѕирна фолија и оставете го на топло да надојде половина час.
* Размесете го тестото да се истисне воздухот и оставете го повторно да стаса.
* Повторете го ова уште два-три пати.
* Намрсете тавче за печење со маслиново масло. Префрлете го тестото и распоредете го до краевите на тавчето.
* Покријте го со фолија и оставете го да стаса уште половина час.
Загрејте ја рерната на 200 степени Целзиусови.
Ставете 2 лажици маслиново врз тестото и со прстите направете длабнатини по целата површина.
Ставете додатоци по желба. Јас ставив црвен кромид, магдонос, гранчиња мајчина душица, малку морков и крупна сол.
* Печете 20-25 минути во зависност од вашата рерна, додека добие убава боја.

Пријатно!