Денеска, по повод Илинден, делегација на Левица, предводена од пратеникот и претседател на партијата Димитар Апасиев, положи свежо цвеќе на Мечкин Камен, заедно со членот на Президиумот Александар Симонов и раководителката на Црвена младина, Милица Давчева.

И во 1903 и во 1944 година, Илинден претставува прекин на поредокот кој го одржуваше угнетувањето, понижувањето и нееднаквоста. Беше удар врз систем кој го држел народот без глас, без моќ и без иднина. Денес суштината повторно се отвора преку прашањата: Кому му служи оваа држава? Чии интереси брани? Зошто младите бегаат, а постарите молчат? И каде исчезна идејата дека оваа земја може да биде место за слободен и достоинствен живот за сите? Државата е терен каде што секој ден се судираат интересите на трудот и капиталот, на мнозинството и елитата, на поробениот и угнетувачот. И додека човекот е подреден на профитот, додека политиката е заложник на геополитички диктати, а историјата се прекројува по нарачка – Илинден останува жива обврска, а не завршена страница. Сѐ додека не изградиме општество во кое човекот ќе биде над капиталот, државата ќе биде алатка на народната волја, а земјата заштитена од распродажба и бришење – Илинден нема да биде минато, туку задача, пишува во соопштението од Левица.