Новогодишните и божиќните празници асоцираат на заедништво, среќа, слога и љубов. Ваквата атмосфера можат да ја почувствуваат и децата од СОС Детското село во Скопје, кои празниците ги поминуваат заедно со своите згрижувачки семејства.

Разговаравме со Мирјана Пејчинова, Наташа Симакоска и Силвана Тушевска, згрижувачки кои долги години се грижат за дечињата и нивната благосостојба. Тие пред камерата на „Слободен печат“ го споделија нивното досегашно искуство како згрижувачки и кои се нивните планови со дечињата за божиќните празници.

На прашањето како тие го поминуваат своето време со децата, згрижувачката Силвана одговори:

– Имам четири деца на школска возраст и едно бебенце. Обврските околу бебенцето се знаат, а две од децата кои се во училиште се помали и на нив им треба посебно внимание околу училишните обврски. Заедно пишуваме, учиме, читаме и сè што треба околу училишните активности. Надвор од овие акитвности, месиме, правиме колачи, играме со пластелин, глина и слично – вели Силвана.

Божиќните празници тие планираат да ги прослават во домашна атмосфера и да ги испочитуваат празничните традиции.

– Бадник го прославуваме со традиционално месење погача со паричка и приготвување на традиционални јадења на трпезата. Децата одат и на коледе, но затоа што се помали, одиме заедно – додаде згрижувачката Мирјана.

Со директорката на приватната установа за вонсемејна заштита СОС Детско Село – Скопје, Наде Качакова, разговаравме за начините на кои граѓаните може да донираат и за сите новости од институцијата.

– Оваа година отворивме две подрачни одделенија во Кавадарци и Струмица за да можеме да ја доближиме стручната помош и поддршка за згрижувачките семејства. На овој начин ќе се доближиме повеќе до семејствата, одблиску ќе ги следиме нивните потреби, ќе ги поврзуваме со сите релевантни чинители во заедницата како центрите за социјална работа и општините, како и нашите партнери кои им помагаат на децата и ги зајакнуваат вештините на младите за да можат тие полесно да влезат на пазарот на трудот – кажа директорката Качакова.

Целата сторија од СОС Детското село во Скопје може да ја видите на видеото во продолжение.