Шопинг платформата „Јизи“ (Yeezy) на Канје беше деактивирана откако на неа се продаваа маици со црни свастики. Во својата реклама за Супербол, раперот ги покани следбениците да одат на неговата страница, која сега е недостапна.

Ако врската до страницата се внесе во пребарувачот, на екранот ќе се појави порака дека нешто тргнало наопаку и дека продавницата е недостапна. „Shopify“, компанија која „домаќини“ неколку онлајн продавници, се огласи за сѐ.

„Сите трговци се обврзани да ги следат правилата на нашата платформа. Овој трговец не ги следеше одобрените практики и ги прекрши нашите правила и услови, а ние го отстранивме од нашата страница“, се вели во соопштението за „Ен-би-си Њуз“ (NBC News).

Да потсетиме, откако купи простор за рекламирање од 30 секунди за време на Супербол на кој беше објавена реклама за неговата веб-страница Yeezy, раперот почна да продава маици на кои имаше свастика. Белите маици со црна свастика на предната страна беа единствениот производ што можеше да се купи на неговата веб-страница, а беа по цена од 19,95 евра.

Тој неодамна предизвика и лавина реакции откако на Икс сподели фотографија од истите маици со кукасти крстови, тврдејќи дека со години сакал да ги „направи“. „Ова е моето најголемо уметничко дело досега“, рече тој. На маицата стои натписот „HH“, за кој многумина веруваат дека е упатување на фразата „Хајл Хитлер“.

По претходните антисемитски испади, Канје го избриша својот Икс профил. Во неговата последна објава пред бришењето, тој му се заблагодари на Илон што „му дозволил да се искаже“, односно да ги пренесе своите фрустрации. Маск набрзо потврди дека јавноста повеќе нема да може да го види профилот на Вест.