Македонија во првото коло од Европското одбојкарско првенство, Група Ц, утре игра против Данска меч што го смета за исклучително важен. Иста тежина овој дуел има и за Данците.

Данците го сметаат учеството на ова ЕП историско, затоа што им е второ воопшто, односно прво по 2013 година, кога го освоија 12. место.

Веројатно најдобриот поединец кај Данците, коректорот Мадс Кјед Јенсен, играч на италијанскиот тим Кунео волеј, со нетрпение го чека дуелот со Македонија.

– Натпреварот против Македонија дефинитивно е мечот што најмногу го очекувам. Знам колку се мотивирани и знам дека играат дома, но исто така знам дека е навистина важен натпревар за нас во однос на пласман во осминафиналето. Затоа мислам дека тоа дефинитивно ќе биде најинтересниот натпревар – вели Мадс.

Овој одбојкар беше клучен во поразот на Македонија од Данска во 2021 година во финалето на Европската сребрена лига во Струмица со (3-1) кога постигна 32 поени.