Данската влада објави дека ги укинува даноците на кафе и чоколадо за да им обезбеди финансиска помош на домаќинствата кои се борат со растечките трошоци. Ова доаѓа само неколку дена по укинувањето на ДДВ за книгите. Администрацијата на премиерката Мете Фредериксен одлучи за мерката во петокот, а целта е да им се даде простор на Данците да дишат во услови на висока инфлација.

„Одлучивме да спроведеме чекор што ќе има непосредно влијание врз животот на луѓето. Тие брзо ќе забележат повеќе пари во своите паричници“, изјави за ТВ2 вицепремиерот Трол Лунд Поулсен.

Данската даночна агенција проценува дека отстранувањето на данокот ќе ја намали цената на пакет кафе за 5 круни (приближно 0,66 евра). Данокот на чоколадо, кој се смета за најстариот данок во Данска, моментално се однесува на сите производи што содржат какао, слатки, зашеќерено овошје и мастики за џвакање.

Цените на чоколадото во Данска се зголемија за повеќе од 25% во изминатата година, додека цените на кафето скокнаа за 35,5%, според најновите статистички податоци. Генерално, цените на храната се зголемија за 6,5% во истиот период. Иако намалувањето на даноците е наменето да им користи на потрошувачите, тие ќе ја чинат данската државна каса околу 2,4 милијарди круни (321 милион евра) изгубени приходи, пренесува „Сега.бг.њус“ .