Судскиот процес за аптекарот од Клиниката за онкологија Калтрин Уштеленца обвинет за примање поткуп од сега покојната пациентка Минка Веизовска која го пријави, тапка во место со месеци.

Во Основниот суд Скопје 1 денеска повторно се одложи рочиштето поради тоа што Апелациониот суд три месеци нема донесено решение дали снимката на која е наводно тајно снимен Уштеленца и договорот за поткупот, а која е извлечена од мобилниот телефон на сега покојната Веизовска, треба да биде прифатена или да биде одбиена како доказ во постапката.

Првостепениот суд го прифати овој видео материјал снимен од мобилен телефон како доказ, но одбраната на Уштеленца се жалеше на таквата одлука. Оттогаш па наваму, трет месец Апелациониот суд нема донесено одлука дали тајната снимка може да се користи во постапката како доказен материјал или не и со тоа процесот е блокиран.

Во судница се појавуваат сите, и обвинетиот и неговата адвокатка, обвинителот и адвокатот на оштетените, но решението од Апелација никако да се појави. Не помогнале ни неколку ургенции од судијката упатени до Апелациониот Суд. Минка Веизовска беше пациентка со карцином на белите дробови која се лекуваше на Клиниката за онкологија во Скопје. Таа почина на 22 ноември минатата година но предметот продолжи поради тоа што беше отпочнат по службена должност од страна на ОЈО Скопје.

Според обвинението при крајот на 2022 година Веизовска му дала обележана банкнота на Уштеленца како поткуп, за тој да ѝ даде биолошка терапија „кејтруда“. Веизовска пред да почине во судница рече дека иако имала лекарски извештај, била здравствено осигурана и терапијата требало да ја прима бесплатно, сепак за тоа морала да плаќа мито.

Според нејзиното сведочење, откако го известила тогашниот економски директор на болницата Нехат Нухи дека е уценувана за терапија, односно дека мора да дава пари за да ја има, тој ја охрабрил случајот да го води до крај и да пријави во МВР.

Ситуацијата се вжешти во судницата кога Веизовска еден месец пред да почине, обелодени дека на мобилниот телефон има снимка наводно од договорот меѓу неа и обвинетиот со која сакаше да докаже дека навистина плаќала мито.

Првостепениот суд ја прифати снимката откако таа снимка беше крим-технички обработена од МВР, но потоа адвокатката на аптекарот вложи жалба до Апелациониот суд со образложение дека снимката е незаконска, поточно дека е снимена тајно и со кршење на правата на обвинетиот. Три месеци Апелациониот суд нема донесено решение дали овој доказ да се користи во постапката или да не се користи, па судскиот процес е заглавен и не може да се одржи седницата со завршни зборови.

Веизовска еден месец пред да почине, во судница рече дека иако имала лекарски извештај и била здравсвено осигурана и терапијата требало да ја прима бесплатно, сепак за тоа морала да плаќа мито.

-Ми рече дека треба да ја плаќам кај него лично, за да ми ја крие. Потоа си теравме ние подолго време така. Јас го прашав, дали некогаш ќе има регуларно терапија без да ја плаќаме, а тој ми одговори дека никогаш нема да има без пари. Имаше и професор доктор, чија сопруга имаше карцином. Аптекарот ме убедуваше дека и професорот морал да плаќа за да има терапија за неговата жена. Со оглед на тоа што имам тешка болест, јас друг избор немав. Кога го прашав колку пари треба, рече од 50 до 100 евра. Ама никому од сестрите да не кажувам, да немам контакт со другите вработени. Ако разберел дека имам контакт со други, немало да има терапија за мене, рече Веизовска пред судот, еден месец пред да почине.

Уштеленца пак, се изјасни за невин, а неговата одбрана тврдеше дека парите не ги ни допрел со раката, туку му биле ставени во дуксерот. Рече дека Минка Веизовска не ја познавал од порано.

Денот кога се случи ова, излегов на пауза околу 9 часот, си зедов за јадење и си седнав во паркот да јадам. После тоа дојде Минка, седна до мене, ме чекаше да јадам, ми ги стави парите во џебот на дуксерот и потоа стана и бев лишен од слобода, не можев ништо да направам. Не успеав ни да ги допрам парите што ми ги стави во џебот од дуксерот. Кога ме однесоа во полициска станица Беко, побарав да се вештачат парите, дека не сум ги чепнал. Инспекторот рече „добро“. Му реков да ми ги земе парите од џеб, но тој ми кажа дека јас треба да извадам се што имам кај себе, рече Уштеленца во своето сведочење пред судот.

Неговото тврдење е спротивно на она на инспектор од МВР кој сведочеше во судница дека бил на местото на наводното примање на поткупот во близина на Клиниката за онкологија заедно со уште шестмина полицајци кои биле распоредени околу аптекарот и видел, како тој со десната рака ја зел банкнотата од сто евра, ја ставил во дуксерот и продолжил да појадува.

Аптекарот од Клиниката за онкологија, Калтрин Уштеленца според обвинението, примил награда за да на пациентката Минка Веизовска која боледува од карцином на белите дробови, ѝ издаде скапа биолошка терапија „кејтруда“, која што би морал да ѝ ја издаде бесплатно, со оглед на тоа што таа била осигуреник на Фондот за здравство и имала медицински извештај за терапијата.