Љубовта на родителите кон детето никогаш не се менува, без разлика на возраста. Сепак, тоа не значи дека односот со детето нема да се развива и менува со текот на годините. Понекогаш тоа ќе биде во позитивна насока и ќе завршите како најдобри пријатели, но постојат и ситуации кога односот со возрасното дете може да стане покомплексен.

Ако вашата врска со вашиот син или ќерка спаѓа во втората категорија, не сте сами. Многу родители се борат со поврзувањето со своите деца. Добрата вест е што експертите велат дека само затоа што вашата врска не е цврста во моментот, тоа не значи дека треба да остане таква.

Психолозите Тај Алонсо и Ана ВанМетер за „Парејд“ откриваат дека има работи што можете да ги направите за да ја подобрите вашата врска, ако сте спремни да вложите труд. Тие велат дека поправањето на секоја нарушена врска не е лесно, но не е невозможно.

Како да се подобри односот со возрасните деца?

„Може да има многу причини зошто односите меѓу родителите и нивните возрасни деца страдаат“, објаснил Алонсо.

Но, ВанМетер вели дека тоа може да се поправи.

„Доколку врската помеѓу родителот и возрасното дете не е толку силна како порано, таа може да се поправи и зајакне со текот на времето. Ова бара и од родителот и од возрасното дете да вложат напор. Двете страни треба да бидат отворени, да ги почитуваат границите и да преземат одговорност“, истакна таа.

Што им треба на возрасните деца од нивните родители?

Наместо да го гледате вашиот син или ќерка како свои деца, ВанМетер предлага да се обидете да го промените вашиот начин на размислување и да почнете да ги гледате како пријатели.

„На некој начин, здравата врска помеѓу родител и возрасно дете може да биде повеќе како пријателство меѓу двајца возрасни отколку врска родител-дете“, вели таа.

Кога ќе почнете да ги гледате на тој начин, тоа може да направи голема разлика во начинот на кој се однесувате и разговарате со нив, зајакнувајќи ја вашата врска.

„Понекогаш тоа е сè што е потребно со работи како меѓусебно почитување, љубов и поддршка“, додава таа.

Едноставен чекор за подобар однос со возрасните деца

Како и во повеќето врски, комуникацијата е клучна. Затоа Алонсо и ВанМетер се согласуваат дека ова е најважното нешто што треба да го подобрите за да го подобрите односот со вашите возрасни деца.

„Важно е сите страни да имаат отворена комуникација за тоа што би било корисно за воспоставување здрава врска. Обидете се да слушате без осудување или одбрана и обидете се да го запознаете вашето дете како што е сега“, забележува Алонсо.

Можете да започнете со наоѓање начини да им дадете до знаење дека ви недостасува врската што некогаш сте ја имале и сакате вашата врска да расте. Сепак, ВанМетер вели дека стилот и тонот на вашата комуникација се клучни.

„Наместо да кажете нешто како ‘Заборави на мене!’, обидете се да кажете нешто како ‘Ми недостигаш и со нетрпение очекувам да се видиме!’. Едноставно и слободно изразете наклонетост“, истакна ВанМетер.

За да се осигурате дека вие и вашите возрасни деца подобро комуницирате, Алонсо и ВанМетер составија листа на некои работи што често ги раздвојуваат родителот и детето, а кои можете да се обидете да ги подобрите.

– Слушајте
– Почитувајте ги
– Потрудете се да се гледате
– Изразете им безусловна љубов
– Не носете одлуки во нивно име
– Преземете одговорност за вашите грешки
– Согласете се да не се согласувате
– Немојте постојано да им давате совети