Според индискиот медиум „Економик Тајмс“, фармацевтскиот гигант „Крка“ од Ново Место е во преговори за преземање на сопственоста на компанијата која ја контролира Унихем Лабораторис од Мумбаи. Мнозински сопственик на оваа компанија со 50,93 отсто е Пракаш Амрут Моди и неговото семејство.

Ова би ја отворило вратата за Крка да купи дополнителни 26 отсто од акциите, наведуваат и медиумите. Од Крка за Н1 Словенија, одговориле дека Унихем е еден од нивните добавувачи долги години.

„Произведува некои активни состојки и полупроизводи за групацијата Крка. Со цел оптимизирање на производството, редовно ги проверуваме можностите за проширување на соработката со некои од нашите деловни партнери во ЕУ, Индија, Кина и на други места. Унихем е еден од овие деловни партнери“, велат тие за „Н1“.

„Економик тајмс“, исто така, пишува дека Крка размислува да купи удел, бидејќи тоа ќе и даде силна позиција на пазарите во САД и Латинска Америка, каде што е веќе присутна Унихем Лабс, вклучително и во областа на кардиологијата, дијабетесот, неврологијата и антиинфламаторните лекови.

Поради остриот пад на цената на акциите, разговорите за продажба или влегување на Крка во сопственост на индиската компанија се одвиваат бавно. Акцијата падна за 35 отсто од нејзината највисока забележана вредност во ноември минатата година.