Неодамна во Белград беше соопштен составот на новата влада на Србија, состав од кој домашната, но и европската јавност се очекува да се определи околу прашањето во врска со воведувањето санкции за Русија но и дали ќе се усогласи со европската надворешна политка. Повторно како и во минатото во владата како главен „играч“ кој ќе ги влече потезите од се наметнува лидерот на српските социјалиси Ивица Дачиќ кој според многумина важи за проруски определен политичар.

Вака накратко московскиот весник „Комерсант“ ја опишува политичката ситуација во Србија по обелоденувањето на министерскиот состав и распределбата на министрските места, оценувајќи дека новата влада е „свртена кон Истокот“, што ќе рече кон Русија.

Во својата анализа весникот ова тврдење го поткрепива со податокот за елиминацијата од владата на Зорана Михајловиќ која досега беше и владин потпреседател но и важеше за човек кој ги цени западноевропските вредности. Угледниот руски весник за неа пишува дека била „силно прозападно отиентирана политичарка“ и потсетува дека таа на неколку пати, јавно, ја има обвинувано Русија дека во Украина води освојувачка војна. Според „Комерсант“ Михајловиќ беше најгласниот заговарач за ускладување на српската надворешна политика со онаа на ЕУ што инаку е една од главните обврски на земјите кандидати за влез во Унијата, како и за свртувањето на Белград кон Западот.

Инаку, овој весник повеќепати досега ја има повикувано владата во Белград да се определи по ова прашање, како и тоа дека не ќе може и понатаму да се опира на западните притисоци и да не се определува на која страна сака да припаѓа на Западот или на Истокот.

Во меѓувреме германски „Дојче веле“ на оваа тема пишува дека санкциите против Русија и решавањето на косовскиот проблем ќе бидат клучни теми со кои ќе се занимаваат српските власти во наредниот период. Ако се погледне кадровскиот состав на идната влада, според германскиот медиум тоа може да се заклучи каков ќе биде надворешнополитичкиот курс на Србија по формирањето на новата влада.

Филип Шварм, одговорен уредник на неделникот „Време“ смета дека „составот на владата не ги одразува ставовите на Вучиќ и дека новата влада е повеќе фокусирана на домашната сцена и на подмирување на интересните групи. Владата ќе ја аминува секоја негова надворешно-политичка одлука, а неговата надворешна политика е политика на двојна игра. Самиот Вучиќ изјави дека СПС добро прошла поради поддршката на Русија по почетокот на војната во Украина, и еве Дачиќ е министер за надворешни работи. Како проруски кадар може да се смета и Никола Селаковиќ досегашниот шеф на дипломатијата.“

„Мислам дека врз основа на сето ова може да се заклучи дека ова е политика – добро утро чаршијо на сите четири страни на светот (н.з. истовремено “седење на Белград на четири столчиња“ – Русија, ЕУ, Кина и САД). Со ова ќе се купува време околу санкциите за Русија и Косово, бидејќи притисокот на меѓународната заедница нема да биде насочен кон оваа влада туку кон Александар Вучиќ,“ заклучува одговорниот уредник на неделникот „Време“, за гермнскиот медиум.