Некои луѓе ставаат паста за заби на мозолчињата бидејќи веруваат дека на овој начин побрзо ќе се ослободат од нив. Сепак, дерматолозите имаат поинакво мислење. Тие објаснија зошто не треба да го правите ова.

„Севкупно, доказите дека ставањето паста за заби на мозолче е корисно се минимални. Нема формула што одговара на кожата и понекогаш може да предизвика иритација на кожата. Ова особено важи за пастите за заби што содржат средства за белење и флуор“, изјави дерматологот Жаклин Вочмејкер за „Хелт“ (Health).

Покрај горенаведеното, тие може да содржат и состојки кои ја сушат кожата, како што се ментол и сода бикарбона. Триклозанот има антибактериски својства, но дополнителните истражувања покажаа дека неговата ефикасност е ограничена. Кога се нанесува на кожата, пастата може да предизвика воспаление што може да доведе до други проблеми со кожата.

„Воспалението предизвикано од паста за заби може потенцијално да резултира со долготрајни кафеави или бели дамки, па дури и лузни, па затоа не препорачувам употреба на паста за заби на кожата под никакви околности“, изјави дерматологот Сара Могадам.

Флуорот во пастата за заби е поврзан со периорален дерматитис, осип околу носот и устата што наликува на акни. Оваа состојба може да биде комплицирана за лекување.

За да се ослободите од мозолчињата, дерматолозите препорачуваат други третмани како што се користење на хидроколоидни лепенки за мозолчиња, салицилна киселина, бензоил пероксид, азелаична киселина итн. Доколку не забележите подобрување во рок од четири до шест недели од употребата на производи против акни што се продаваат без рецепт, побарајте помош од дерматолог.