Сите знаеме дека најважно овошјето секогаш убаво да го измиеме пред да го јадеме.

Но сепак, дури и темелното миење можеби нема да ги отстрани црвите од овошјето доколку ги има во него. Црвите најчесто се наоѓаат во сливи, вишни и цреши, а ние генерално не гледаме во внатрешноста на овие овошја пред да ги јадеме.

Многумина се прашуваат дали јадењето овошје со црви е безбедно за нашето здравје. Всушност, се покажува дека е побезбедно од јадењето скапано овошје.

Како што истакнува порталот „Газета Поморска“, црвите во овошјето не предизвикуваат болести, ниту нивните ларви. Јадењето овошје со црви не треба да предизвика никакви проблеми со варењето.

Јадењето „црвливи“ цреши, кои содржат бели ларви од овошната мушичка (Rhagoletis cerasi), е генерално безбедно. Јадењето такво овошје нема да предизвика дигестивни симптоми, а камоли труење со храна, вели Радослав Богуш, инженер од Одделот за прехранбено инженерство и организација на производство при Институтот за прехранбени науки SGGW, во интервју за порталот haps.pl.

Скапаното овошје претставува многу посериозна закана за нашето здравје. Ако овошјето стане кафеаво (со дамки или целосно) и омекне, треба да го избегнуваме. Ова се должи на „развојот на непожелна микрофлора за нашето здравје“. Експертите нагласуваат дека таквото овошје треба да се фрли.

Мувлосаното овошје исто така не треба да се јаде. Вреди да се запомни дека дури и ако мувла се појави на мал дел од овошјето, тоа треба да се фрли. Ова е затоа што, иако може да не биде видлива, спорите на мувла се присутни низ целото овошје.