Секој кој печел риба, зеленчук или се обидел да ја задржи сочноста на месото, веројатно користел алуминиумска фолија. Во домаќинството се користи ширум светот со децении, но на интернет повторно се појави дилемата за тоа дека е штетна за нашето здравје.

Алуминиумската фолија е лист од сјаен алуминиумски метал, тенок како хартија. Масовно се произведува преку процес на тркалање големи метални плочи додека не се истенчат на околу 0,2 милиметри. Овие метални листови имаат широк спектар на намени надвор од кујната, вклучително и во индустриското пакување, изолација и транспорт.

Алуминиумот го има насекаде, па всушност не мора да е проблем само фолијата што ја користиме. Тој е природен и е трет најзастапен елемент во Земјината кора. Во својата природна состојба, тој обично е поврзан со други елементи како што се фосфати и сулфати, па покрај тоа што се наоѓа во материјалите за пакување храна, тавите за печење, па дури и козметиката, тој се наоѓа и во почвата, во нашата вода за пиење и во нашата храна. Природно се наоѓа во овошјето, зеленчукот, месото, рибата, житарките и млечните производи. Адитивите за храна, како што се конзервансите, средствата за боење и вештачките згуснувачи, исто така содржат алуминиум.

Количината на алуминиум што ја внесуваме зависи од неколку фактори, кои се однесуваат на тоа колку лесно се апсорбира во самата храна, колку е богата со алуминиум почвата во која се одгледувала храната, како била спакувана и складирана и дали содржи адитиви.

Вистина е дека алуминиумот може да биде опасен по вашето здравје, но доколку е на високо ниво. Некои истражувања открија докази дека металот може да биде поврзан со Алцхајмерова болест, бидејќи се забележани покачени нивоа на алуминиум кај луѓето кои живеат со оваа состојба, додека други шпекулираат дека може да биде поврзан и со ракот. Но, резултатите се далеку од убедливи и потребни се понатамошни големи истражувања.

Како и кај многу метали, важно е да се намали количината што ја консумираме, но тешко е целосно да се елиминира. „Светската здравствена организација“ и „Организацијата за храна и земјоделство на Обединетите нации“ изјавија дека е прифатливо да имаме ниски нивоа на алуминиум во нашите системи, околу 2 милиграми на килограм телесна тежина неделно. Истражувањата покажаа дека алуминиумот содржан во приборот за готвење и во фолијата, може да се разложат во нашата храна. Факторите кои влијаат на количината на разложување на алуминиумската фолија, ја вклучуваат температурата на која се готви, киселоста на храната и присуството на други состојки, како што се зачини и соли. Една студија објавена во 2006 година покажа дека количината на алуминиум во печеното црвено месо подготвено во фолија може да се зголеми од 89 % до 378 %. Ова може да изгледа загрижувачки, но за сега се чини дека нема цврсти докази дека ваквото внесување на алуминиум од фолија е поврзано со зголемен ризик по здравјето.

Сепак, ако се двоумите, користете помалку фолија да го ограничите ризикот при готвење на високи температури, користете помалку фолија при обложување на храната и избегнувајте употреба на прибор обложен со алуминиум. Можете исто така да го намалите количеството на алуминиум што го консумирате со консумирање исклучиво на домашно зготвени оброци.