Претседателот на Владата, Христијан Мицкоски оцени дека далечинското централно затоплување на домовите е најсигурен и најевтин начин.

Тој денеска присуствуваше и се обрати на надзорната расправа во Собранието посветена на животната средина.

„Нема друг начин, освен тоа за што веќе зборував. Тоа е да имаме далечинско централно затоплување. Не постои друг начин. Или ако продолжиме со процесот на секундарна и терцијална гасификација, па да донесеме дома, до домаќинствата гас, па потоа да се инсталираат гасни котли, кои понатаму ќе продуцираат, во рамките на домаќинството топла вода за затоплување на домот. Онаму каде сега се користат дрва или некаде се користи екстра лесно масло за горење, некаде нафта итн. или далечинско затоплување“, одговори Мицкоски на прашање на пратеничката Каролина Настовска.

Тоа, според Мицкоски, може да се направи само со организиран настап.

„Вториот начин е, ако гледаме парцијално на проблемите, за што не сум голем поборник, да субвенционираме инсталирање на инвертер клима уреди, или пак субвенционирање на топлински пумпи, коишто би ги вградиле во своите домови, а со кои тие понатаму би продуцирале затоплување и ладење на домот. Кога станува збор за затоплувањето, јас сум повеќе за далечинско затоплување, можеби ќе треба повеќе време, но кога тоа ќе се заврши, тоа значи дека сигурно имаме далечинско затоплување и сигурно имаме најевтин ресурс за затоплување на нашите домови“, посочи премиерот.