Претседателот на Демократската унија за интеграција, Али Ахмети, за време на говор во Чаир, ги негираше „наводите дека Албанците сакаат да ја поделат Македонија“.

„Ако сакавме да ја поделиме Македонија, тоа ќе го сторевме во 2001 година со петнаесет илјади вооружени луѓе“, рече Ахмети.

Тој додаде дека партијата се залага за унитарна и рамноправна држава за сите, а не за „тиранин за едни“. На партискиот настан, заедно со кандидатите за градоначалници Бујар Османи и Скендер Реџепи – Зејд, Ахмети го потпишал т.н. „Закон за Чаир“, со што, како што рече, го потврдиле најголемото национално единство од 2001 година.

„Сите се обединети за да го вратат достоинството, честа и да ги заштитат достигнувањата. Борбата некогаш беше за еднаквост, денес е за заштита од дискриминација и лошо управување. Сенародното движење на отпор и надеж станува сè посилно и поинклузивно“, порача Ахмети, повикувајќи ги граѓаните да се подготват за октомврискиот, како што го нарече, „референдум“.