Најмногу вработувања има во предизборието и тоа во образованието, локалната самоуправа и здравството, потврди министерот за информатичко општество и јавна адмистрација, Адмирим Алити, согласувајќи се со една од најголемите забелешки на ЕК – дека со години се ветува, ама ништо не е направено да се намали јавната даминистрација.

-Департизацијата е феномен во нашето општество и точно е дека најмногу вработувања се случуваат пред избори и тоа во општините, училиштата и во здравството. Тоа, ќе се смени со новите закони. Сепак, треба да се каже дека ние како централна власт директно немаме никакво влијание врз овие посочени сектори. Индиректно, со законите за вработените во јавниот сектор и за административни службеници, се обидуваме да поставиме механизми и инструменти кои ќе им олеснат на институциите да бидат поефикасни во делот на новите вработувања – изјави Алити, пред почетокот на јавната расправа за Нацрт верзијата од Стратегијата за реформа на јавната администрација 2023-2030.

-За да има системско решение при регрутирањето на вработените, целта е да нема можност директорите на училиштата, болниците или градоначалниците да вработуваат партиски послушници, односно тоа да им е тешко или во идеална ситуација невозможно да го сторат. Ние сите како општество треба да се залагаме да нема институции кои вработуваат само за политичката партија. Не е битно дали јас ќе бидам министер уште месец дена, ова ќе биде аманет за сите идни вработувања во јавниот сектор – додаде Алити, посочувајќи дека оваа Стратегија за прв пат се носи за осумгодишен период.

Инаку, департизацијата и создавање на потранспарентна јавна администрација и МЕРИТ систем ќе бидат во фокусот на новата Стратегија за реформа на јавната администрација 2023-2030. Досегашната Стратегија за периодот 2018-2022, веќе истекува, а тимовите од МИОА, во соработка со експерти на СИГМА и РЕСПА, но и номинирани лица од други институции работат на донесувањето на новата Стратегија за реформа на јавната администрација 2023-2030. Според министерот Алити, реформата во јавната администрација претставува еден од клучните приоритети во пристапното партнерство и е важен предуслов во процесот на европската интеграција на нашата држава.

-Но, секако, останува да работиме на унапредување на дел од областите, каде во меѓународните извештаи е нотирано дека ќе треба да се подобриме – додаде министерот. Целта е, како што рече, да се обезбедат квалитетни и брзи услуги на граѓаните