Многу видови овошје можат да сокријат несакан „гостин“ – црв.

Ако сте внимателни и го сечете овошјето пред да го јадете, не е тешко да се забележи присуството на црв, но понекогаш може да го пропуштите и можеби веќе сте изеле половина од овошјето пред да сфатите дека во него се вдомил црвот.

Кои се здравствените ризици ако црв „се насели“ во вашето овошје? Можете ли сепак да го јадете или треба да го фрлите?

Белиот црв што го наоѓаме во внатрешноста на плодот, чија должина варира меѓу 3 и 12 милиметри, не е ништо друго туку ларва на мува, а неговото присуство е доказ дека овошјето е заразено и дека затоа повеќе не е добро за јадење, пишува „Нови лист“.

Всушност, ларвите можат да бидат преносители на бактерии од надворешната средина, од отпадот или дури и од изметот со кој мувите дошле во контакт и со тоа да го претворат овошјето во закана за вашето здравје.

Меѓу бактериите кои најчесто ги пренесуваат ларвите на муви се салмонела, ешерихија коли и миаза, одговорни за цревни инфекции со понекогаш драматични резултати.

Ако случајно сте изеле овошје кое било нападнато од ларви и сте добиле цревна инфекција, можете да регистрирате симптоми како што се:

– грчеви во стомакот
– дијареја (пролив)
– повраќање
– зголемена телесна температура
– крв или ларви во столицата

Кога се присутни овие симптоми, препорачливо е веднаш да се јавите на лекар за да избегнете посериозни последици.

Пронајдете ги црвите во овошјето

Пред да консумирате овошје, особено она во кое може да има ларви од мува, препорачливо е да се изврши брза „инспекција“ на кожата и внатрешноста на овошјето.

Допрете го овошјето по целата површина за да видите дали има некои помеки делови и проверете ја кожата дали има дупки.

Потоа земете нож и исечете го овошјето прво на половина, а потоа на помали парчиња, проверувајќи секој пат дали во него има дупки или ларви.