СМС-пораки во кои Центарот за управување со кризи (ЦУК) известува дека Владата донела одлука да прогласи кризна состојба во целата држава, попладнево им пристигнуваат на граѓаните, два дена откако Владата ја донесе конкретната одлука.

„Ве известуваме дека на територијата на цела држава е прогласена кризна состојба за полесно справување со шимските пожари. Воедно ве известуваме и дека во сила е забрана за движење во шумите“, пишува во пораката со потпис ЦУК.

Пораката е на македонски јазик со латинична поддршка.

Владината портпаролка Марија Митева уште во вторникот соопшти дека е донесена одлуката за кризна состојба во траење од 30 дена.

– Ова на терен значи дека се овозможува интегриран пристап и координирано дејствување на сите надлежни институции – Армијата, полицијата, сите противпожарни единици, Центарот за управување со кризи и Дирекцијата за заштита и спасување и локалните самоуправи. Ќе се мобилизираат сите ресурси вклучително и човечки, технички, логистички се со цел да се справиме со пожарите и заштита на населението- рече тогаш Митева.