Зголемувањето на данокот за хотелско сместување во Црна Гора од 7 на 15 проценти предизвика неочекувани последици: во текот на изминатата година, дваесет хотели ја сменија својата категоризација, преминувајќи од хотел во приватно сместување.
Претседателот на Здружението на хотели на Црна Гора, Никола Пејовиќ, објаснува дека сопствениците не направиле ништо нелегално, туку ја искористиле можноста да избегнат повисоки давачки, кои се значително повисоки за хотелите отколку за приватното сместување.

Промената во категоризацијата не мора да значи пад на квалитетот на услугите. Финансискиот аналитичар Ана Нивес Радовиќ истакнува дека повеќето хотели го одржуваат истото ниво на услуги, но формално се рекатестираат со цел да се намалат трошоците. Сепак, на долг рок, оваа практика може да ја оштети конкурентноста на црногорскиот туризам- пишува Каматица.

Одлуката за зголемување на даноците е донесена и покрај предупредувањата на експертите дека тоа ќе има негативно влијание врз туризмот, кој сочинува околу 30 проценти од БДП на Црна Гора. Министерството за туризам го регистрираше овој феномен, но не понуди конкретни решенија.

Покрај проблемот со рекатегоризацијата на хотелите, црногорскиот туризам е погоден и од нерегистрирано приватно сместување. Според податоците од март 2025 година, Црна Гора изгубила околу 86 милиони евра поради ова. Никола Пејовиќ предупредува дека има илјадници нерегистрирани единици кои работат во сивата зона, без никаква контрола.

Слабата контрола и несоодветната казнена политика дополнително ја поттикнуваат оваа практика. Како резултат на тоа, минатата година, Црна Гора забележа пад на приходите од туризмот, за прв пат од 2006 година (освен периодот на пандемијата), што укажува на недостаток на долгорочна стратегија за развој на туризмот.