Американското Министерство за правда во понеделникот објави дека е поднесено обвинение против поранешен боксер од тешка категорија од Црна Гора, кој е вмешан во шверц на десетици тони кокаин во вредност од над милијарда долари.

43-годишниот Горан Гогиќ е уапсен во вчеравечер додека се обидувал да се качи на лет за Цирих од меѓународниот аеродром во Мајами, откако бил обвинет од порота во Њујорк, пренесува Ројтерс.

Обвинителите го обвинија Гогиќ за три точки за кршење на федералниот закон, а секоја од точките предвидува задолжителна казна затвор од најмалку 10 години и можна доживотна затворска казна.

Обвиненијата произлегуваат од запленувањето на 19.930 килограми (22 тони) кокаин од три комерцијални товарни бродови во 2019 година, вклучително и 17.956 килограми (19,8 тони) од бродот „MSC Gayan“ додека бил закотвен на поморскиот терминал Packer Avenue во Филаделфија.

Според обвинението, членовите на бандата превезувале кокаин во Европа од Колумбија преку американските пристаништа, користејќи кранови и мрежи ноќе за да ја подигнат дрогата од товарни бродови до кои се приближувале со глисери долж бродските рути.