Над 2.600 луѓе загинаа во израелските напади врз Појасот Газа, соопшти денеска палестинското Министерство за здравство. Исто така бројот на ранети во нападите со кои Израел одговори  на упадите на Хамас на 7 октомври, се искачи на 9600.

Во меѓувреме, портпаролот на израелската војска изјави дека повеќе од 200 членови на Хамас се уапсени на Западниот Брег од 7 октомври наваму. Заробени се 155 израелски војници во Газа.

„Ги известивме семејствата на 155 затвореници кои ги држи Хамас во Газа“, рече портпаролот.

Израел ги повика жителите на северниот дел на Газа, околу 1,1 милион луѓе од вкупно 2,3 милиони во тој тесен појас, да се преселат на југ за да може да изврши операции за уништување на исламистичкото движење Хамас.

Околу еден милион луѓе се преселени од Појасот Газа за една недела, соопшти денеска агенцијата на ОН за палестински бегалци (УНРВА).

Поради лошите временски услови, израелската армија ја одложи офанзивата и денеска даде нова временска рамка за движење на цивилите на северот на Газа на југ од областа, која истече во 13 часот.

Обединетите нации ги критикуваа наредбите и предупредија на хуманитарна катастрофа, велејќи дека Израел има право на самоодбрана, но мора да го почитува меѓународното право.