МПЦ-ОА наместо да обвинува дека податоците од пописот во делот на религиска припадност се нерелевантни, подобро нека поведе сметка како дејствува меѓу своите следбеници, изјави за „Слободен печат“ Апостол Симовски, директор на Државниот завод за статистика.

По објавените резултати од пописот во делот на религиозна припадност, МПЦ-ОА најголема забелешка упати за методологијата на пописот и за обученоста на попишувачите, односно дека граѓаните биле попишувани и како христијани и како православни. Според официјалните бројки, во Македонија 847.390 лица се декларирале како православни, а 242.579 како христијани.

Попишувачите не смеат да сугерираат

– Попишувачите не смеат да влијаат врз одговорите на ниту едно прашање. Ако МПЦ не успеала да им разјасни на своите членови што се христијани, а што православни, треба да размисли и да поведе сметка како дејствуваат кај верниците. Попишувачите немаат право да им сугерираат на лицата што ги попишуваат со потпрашања или да ги наведуваат и да сугерираат да кажат како се чувствуваат. Граѓаните како што се изјасниле на прашањето за религиозната припадност, така се заведени – вели Симовски.

Синодот на МПЦ-ОА во изминатиот петок соопшти дека се сомнева во статистичката прецизност на пописот.

– Применетата методологија во графата „религиска припадност“ очигледно не разликува припадност на религија (христијанство, ислам, јудаизам итн.), на вероисповед (православно христијанство, сунитски ислам, хасидски јудаизам итн.) и на црква или верски заедници/групи (Македонска православна црква, Исламска верска заедница, Еврејска заедница итн.). Ова ги прави презентираните резултати конфузни, а со тоа и неточни, затоа што очигледно не ја одразуваат реалната состојба на верска припадност во земјата – соопшти МПЦ и додаде дека повод за сомневање во точноста на пописот е и непопишувањето на православните Македонци во светот.

ВМРО-ДПМНЕ ќе прави нов попис кога ќе има свој директор

За многубројните оспорувања и непризнавања на пописните резултати и за најавите од некои партии дека сами ќе спроведат попис, Симовски вели дека партиите само со закон може да го поништат пописот и да донесат нов закон за попис, во спротивно сите „партиски“ пописи може да им служат само ним, но не и на државата. За најголемата опозициска партија ВМРО-ДПМНЕ пописот е некомплетен, а пописните резултати ги спорат и партиите на Власите, Турците, опозициските партии на Албанците. Партиите на Србите и на Ромите најавија дека тие ќе спроведат пребројување на српската и на ромската заедница.

Симовски вели дека ако имаат пари, партиите нека си прават попис.

– Може кој сака да си прави попис за свои потреби, но се знае што е официјален попис. Ако имаат пари и организација нека спроведат попис, но тоа ќе биде попис на „жими мајка“. Има закон за попис, пописот е реализиран и само податоците од законски спроведен попис се официјални и важечки. Ако партиите мислат дека пописот е нерелевантен, сомнителен и не знам уште каков, нека донесат закон за поништување на пописот и закон за нов попис – вели Симовски.

Од ВМРО-ДПМНЕ за „Слободен печат“ велат дека нема да предложат закон за поништување на пописот и дека нов попис ќе има кога ќе има нова влада, предводена од нив.

– Оваа влада не ужива доверба кај народот. Закон што ќе биде на дното од приоритетите во некоја фиока и притоа ќе биде условуван од оваа криминална Влада, нема да има. Нов закон за електронски попис што ќе даде точни податоци ќе има кога ќе има ново мнозинство, нов директор на предлог на ВМРО-ДПМНЕ и кога ВМРО-ДПМНЕ, по следните парламентарни избори, ќе има одговорност да води нова влада – велат од ВМРО-ДПМНЕ.

Според опозициската партија, ДЗС направил целосен хаос во графата за религиска припадност со нераспознавањето на христијани и православни и директниот упад во промената на бројот и процентите во религиската определба во графата за атеисти.

Техничка грешка е замената на бројките кај атеистите

Промената, пак, на бројот на атеисти и евангелисти, што викендов се случи во официјалните пописни резултати, Симовски ги објасни како техничка грешка.

– Направена е техничка грешка. Сменети се местата на графите, така што наместо првичната бројка од 355, сега се 8.764 атеисти, додека евангелистите, бидејќи се под 500, не се прикажани во графата. Ја увидовме грешката, се извинивме и ја поправивме. И ние сме луѓе од крв и од месо и може да згрешиме. Сакавме да објавиме што повеќе податоци и направивме грешка. Не станува збор за упад во системот, ништо дополнително не е внесено, само се сменети графите. Базата на податоци е заклучена и не може да се промени – вели Симовски.

Заводот за направената грешка се извини и на официјалниот сајт на институцијата.