Централната изборна комисија на Босна и Херцеговина (ЦИК на БиХ) на својата 39-та седница денес донесе одлука за одземање на мандатот на претседателот на Република Српска Милорад Додик, по потврдувањето на конечната пресуда на Судот на БиХ.

Оваа одлука беше едногласно усвоена.

Претседателот на Република Српска, Милорад Додик, веднаш реагираше откако Централната изборна комисија (ЦИК) на БиХ донесе одлука за прекин на неговиот мандат.

„Уште едно го*но од Сараево. Последно“, напиша Додик на платформата Икс.

На седницата пак, членот на ЦИК, Суад Арнаутовиќ, изјави дека станува збор за декларативна одлука, бидејќи ќе стане конечна дури откако ќе истече рокот за жалба, што може да потрае еден или два месеци поради документација. Затоа, доколку одлуката на Апелациониот суд биде потврдена, тогаш се очекува да се распишат предвремени избори во рок од 90 дена.

ЦИК претходно формално побара доставување на пресудата до Судот на БиХ, бидејќи без официјален документ не може валидно да ја покрене постапката за одземање на мандатот. По приемот на пресудата, Комисијата има законски рок од максимум 15 дена за постапување, додека за предвремени избори се пропишани рокови до 90 дена од завршувањето на мандатот.

Вехид Шехиќ, поранешен член на ЦИК, потврди дека постапката е покрената веднаш по потврдувањето на пресудата и нагласи дека доколку Додик биде номиниран на изборната листа, тоа нема да биде дозволено, а ЦИК на БиХ ќе ја отфрли.

Вехид Шехиќ предупреди дека, дури и ако Додик одбие да ја прифати одлуката и да ги спроведе барањата на Судот на БиХ, можен е притвор за непочитување на правните последици од пресудата.

Со оглед на тоа што Додик во неколку наврати навести дека нема да се повлече од функцијата претседател на РС и покрај конечната пресуда, а тоа го потврди со критична порака на мрежата Икс која напиша еден час пред одлуката на ЦИК.

За потсетување, Додик беше осуден на една година затвор со правосилна пресуда и му беше изречена мерка за безбедност од шестгодишна забрана за вршење на функцијата претседател на Република Српска. Сепак, Додик повеќе не може да извршува никаква законска функција.