Цената на чоколадото низ целиот свет нагло се зголеми поради слабите жетви на какао во Гана и Брегот на Слоновата Коска, најголемите производители на какао во светот.

Според податоците на Евростат, цените во Европската Унија во мај биле во просек за 21,1% повисоки од претходната година. Најголем скок на цената на чоколадото забележа Полска со раст од дури 39,1%, додека во Естонија цените се зголемија за 37,9%, а во Литванија за 36,5%. Од друга страна, Луксембург (+5,2%), Кипар (+9,0%) и Италија (+12,0%) доживеаја најблаг раст на цените.

Меѓународната организација за какао процени дека производството во сезоната 2023/2024 година се намали за околу 10% во споредба со претходната сезона. Главните причини се комбинација од лоши временски услови, болести на земјоделските култури во Западна Африка и климатските промени.

Поради падот на производството, цената на какаото, која порано се движеше помеѓу 2.000 и 3.000 евра по тон, достигна до 13.000 евра. Аналитичарите очекуваат таа да се стабилизира на околу 9.000 евра до крајот на годината.

Овој пад на производството доведе до дефицит во понудата на какао, или разлика помеѓу побарувачката и понудата. Тој дефицит во сезоната 2023/2024 достигна 478.000 тони, што е најголемиот дефицит во последните 60 години. Како резултат на тоа, зголемувањето на цените на какаото предизвика невидена инфлација и дополнително ги оптовари производителите на чоколадо низ целиот свет.