Додека американската администрација воведе царини за своите сојузници и ривали, вклучувајќи ги Европа, Индија, Јапонија и Кина, некои од најстрого санкционираните земји, Русија, Белорусија, Куба и Северна Кореја избегнаа дополнителни казнени мерки.

Во екот на глобалната трговска војна, Трамп воведе царини од 10 отсто за повеќето американски увозни производи. Кина, која е најголемиот снабдувач на стоки на американскиот пазар, сега се соочува со царини од 54 отсто на целиот нејзин извоз во САД, пренесува Ројтерс.

„Соочени со непопустлива економска војна, Соединетите држави повеќе не можат да продолжат со политиката на еднострано економско предавање“, рече американскиот претседател Доналд Трамп при воведувањето на царините.

Белата куќа објави список со коментари од луѓе кои ги поддржуваат мерките, тврдејќи дека американските работници конечно ќе имаат корист по години од, како што велат, злоупотребите од трговски партнери како Кина.

Трамп, исто така, рече дека ќе воведе основна царина од десет проценти на целиот увоз во САД, додека одредени земји ќе бидат погодени со значително повисоки царини.

Сепак, Русија, Куба и Северна Кореја не се најдоа на списокот на земји кои добија дополнителни реципрочни царини, покажуваат официјалните податоци на Белата куќа.

Американските разузнавачки агенции ги наведоа Кина, Русија, Иран и Северна Кореја како најголеми безбедносни ризици за САД во нивниот годишен извештај за закани, а Трамп претходно и се закани на Москва со нови трговски мерки.

На прашањето зошто Русија не е на списокот, американскиот министер за финансии Скот Бесант изјави за Фокс њуз дека САД немаат значителна трговија со Русија и Белорусија и дека тие земји се веќе под санкции.

Според американските податоци, трговијата со стоки меѓу Русија и САД лани изнесувала 3,5 милијарди долари, додека во 2021 година, пред војната во Украина, била 36 милијарди долари.

Русија, против која се воведени 28.595 западни санкции, не објави податоци за трговијата од почетокот на војната. Податоците на Канцеларијата на трговскиот претставник на САД покажуваат дека американскиот увоз на стоки од Русија во 2024 година паднал на три милијарди долари, што е намалување за 34,2 отсто во однос на 2023 година.

За Русија, најголемиот ризик не се директните царини, туку потенцијалното забавување на глобалната побарувачка поради пошироката трговска војна, што може да ја сруши цената на нафтата.

Руската централна банка претходно оваа година предупреди дека САД и ОПЕК имаат капацитет да го преплават нафтениот пазар, што би можело да предизвика повторување на долгиот пад на цените во 1980-тите, кој придонесе за распадот на Советскиот Сојуз.