Жените најчесто не пријавуваат онлајн родово-базирано насилство бидејќи не се информирани каде можат да го направат тоа, но и немаат доверба во институциите дека ќе им помогнат.

Овие наоди се дел од истражувањето спроведено во рамки на проектот „Сузбивање на сексуално и родово-базирано насилство во дигиталната сфера“, кој го спроведува Програмата за развој на Обединетите нации (УНДП) со финансиска поддршка на Министерството за надворешни работи на Јужна Кореја.

Според истражувањето, четири од пет жени не пријавуваат онлајн закани и вознемирувања.

– Пријавив по електронски пат на црвеното копче на интернет страницата на Министерството за внатрешни работи и прикачив соодветни докази. Истата пријава ја испратив преку е-порака до МВР и до Центарот за социјални работи бидејќи стануваше збор за малолетни сторители и за малолетна жртва. Во повратната е-порака пишуваше дека ќе се откријат идентитетите на сите лица. Соработката помеѓу министерството и центарот траеше подолго време, но на крај се постигна задоволителен исход – раскажува една од испитаничките во анкетата, која одлучила да го пријави насилството.

Надлежен за решавање на овие случаи е Секторот за компјутерски криминал во Министерството за внатрешни работи. Сите жртви на онлајн насилство кои ќе се соочат со демнење, вознемирување, родово-базиран говор на омраза, споделување лични содржини на интернет без согласност можат да го пријават случајот во најблиската полициска станица или на електронската адреса [email protected].

– Во борбата против онлајн родово-базираното насилство треба да придонесат сите засегнати страни, вклучувајќи ги надлежните институции, граѓанските и меѓународните организации, локалните заедници, но и жените кои веќе претрпеле ваков тип насилство. Потребно е да се воведат измени во правната и институционалната рамка, со цел да се препознаат различните форми технолошки овозможено родово-базирано насилство, но и да се зајакнат меѓусекторската соработка и ефикасноста на институциите во обезбедувањето заштита на жртвите на овој тип насилство – вели Армен Григорјан, постојан претставник на УНДП.

Во рамки на проектот „Сузбивање на сексуално и родово-базирано насилство во дигиталната сфера“, се организираше и првата специјализирана обука за зајакнување на капацитетите на вработените во институциите надлежни за превенција од сексуална експлоатација и вознемирување на интернет.

Првата група обуки опфати повеќе од 30 учесници, меѓу кои полициски службеници, јавни обвинители, даватели на услуги од центрите за социјална работа и претставници на граѓански организации.

о рамки на кампањата ќе се објават неколку видеа во кои се пренесуваат реални сведоштва на жртви на родово – базирано насилство на интернет.