Шестмина од десетте градоначалници на скопските општини присуствуваа на првиот состанок на Координативното тело на градоначалници одржан годинава кај градоначалничката Данела Арсовска. На средбата што се одржа вчера, не се појавија првите луѓе на општините Бутел, Гази Баба, Ѓорче Петров и Шуто Оризари, а за причините за нивното отсуство од Град Скопје нема објаснување.

Целта на ваквиот состанок е да се координираат активностите на општините во Скопје, а годинава, како што информираа од Град Скопје, темите за кои разговарале градоначалниците биле координирана акција за справување со загадувањето, институционално постапување за интегрираните еколошки дозволи, чистење на дивите депонии, заедничко постапување за справување со комуналните проблеми, како и нови мерки за ограничување на движењето на тешките товарни возила низ општините.

Изготвен е акциски план, се започнува со реализација, а со секоја координација ќе се надополнува планот соодветно на состојбата на терен. Непоходно е да соработуваме сите за да имаме побрзи решенија за кои е неопходна координација и заеднички активности. Само со меѓусебна соработка ќе постигнеме брзи решенија – истакна градоначалничката Данела Арсовска.

Координативното тело на градоначалници под Градот Скопје согласно Закон, делува во интерес на граѓаните, а на седниците се разгледуваат прашања од заеднички интерес на општините под градот Скопје и се изнаоѓаат навремени и ефикасни решенија.