Врската меѓу алкохолот и крвниот притисок одамна го интригира и медицинскиот свет и јавноста. Стручњаците предупредуваат дека една чаша повеќе не мора да биде штетна, но особено во услови на високи температури, редовното консумирање алкохол може сериозно да го зголеми ризикот од кардиоваскуларни инциденти, пишува „Е-клиника“.

За многумина, чаша вино или кригла пиво претставува мал ритуал, начин да се релаксираат по напорен ден или да прослават некој момент. Но, под оваа навидум безазлена навика се крие сложен однос меѓу алкохолот и кардиоваскуларниот систем.

Дали алкохолот го зголемува крвниот притисок? Одговорот не е едноставен ниту еднонасочен, велат стручњаците.

По консумирањето, алкохолот многу брзо се апсорбира преку желудникот и тенкото црево во крвотокот. Дел од него оди на обработка во црниот дроб, но останатиот дел циркулира низ телото, влијаејќи врз срцето, артериите и притисокот. Заради оваа брза апсорпција, ефектите може да се почувствуваат речиси веднаш – од чувство на опуштеност до зголемување на притисокот, во зависност од количината и зачестеноста на консумирањето.

Еден од начините на кои алкохолот влијае на притисокот е преку стеснување на крвните садови. Кога артериите се стеснуваат, срцето мора посилно да пумпа за да ја истера крвта, што го зголемува притисокот. Со тек на време, ова дополнително оптоварување може да доведе до хронична хипертензија – состојба која значително го зголемува ризикот од срцеви болести, мозочен удар и други здравствени компликации.

Покрај ефектот врз артериите, алкохолот директно го оштетува срцевиот мускул. Прекумерната и долготрајна консумација може да доведе до ослабнување на срцето и намалување на неговата способност за ефикасно пумпање на крв. Оваа состојба се нарекува кардиомиопатија и дополнително го влошува високото ниво на притисок. Дури и умерен, но редовен внес на алкохол може да го оптовари срцето.

Според Американската кардиолошка асоцијација, умерена консумација е најмногу едно пијалок дневно за жени и два за мажи. Еден пијалок се смета за 330 мл пиво, 150 мл вино или 45 мл жесток алкохол како вотка или виски.

Кај луѓе кои ретко пијат, ефектите врз притисокот можат да бидат минимални. Некои истражувања дури покажуваат дека мали количини алкохол краткотрајно го намалуваат притисокот преку ширење на крвните садови. Но, ова дејство е привремено и не треба да се толкува како корист за здравјето.

Од друга страна, луѓето кои пијат повеќе од три пијалаци дневно имаат значително зголемен ризик од појава на хипертензија. Колку е поголем внесот на алкохол, толку е поголемо и оптоварувањето за кардиоваскуларниот систем. Хроничната употреба доведува до трајно покачен притисок и до сериозни последици, како срцев или мозочен удар, како и оштетување на бубрезите.

Консумацијата на алкохол при високи температури дополнително го зголемува ризикот од дехидратација, ширење на крвните садови и пад на притисокот, но и од нагли скокови кога телото се обидува да се прилагоди. Во комбинација со физичка активност или долг престој на сонце, алкохолот може сериозно да ја наруши рамнотежата на електролити и да го преоптовари срцето.

Една студија објавена во списанието „Џурнал од клиникал хипертеншн“ во 2023 година покажа дека луѓето кои пиеле алкохол за време на топлотен бран имале 27 отсто поголем ризик од кардиоваскуларни инциденти во споредба со оние кои го избегнувале.

Истражувачите потенцираат дека алкохолот ја намалува способноста на телото да се лади преку потење и ја зголемува веројатноста за топлотен удар и колапс.

Не мора целосно да се откажете од алкохолот за да го заштитите срцето, но потребен е внимателен пристап кон животните навики.

Намалувањето на алкохолот е еден од најважните чекори во превенцијата на хипертензија. Ако пиете често и во големи количини, размислете за постепено намалување. Избор на пијалок со понизок процент на алкохол или денови без алкохол може значително да придонесат.

Прекумерниот внес на натриум е втор најчест предизвикувач на покачен притисок. Солта ја задржува водата во телото, што доведува до зголемен волумен на крв во артериите. Внимавајте на индустриски преработената храна, која често содржи скриена количина сол.

Совет: Особено во лето, размислете двапати пред да посегнете по чаша алкохол на жешко. Вашето срце ќе ви биде благодарно.