Откако дијализни пациенти се пожалија дека несоодветно со комбиња, наместо со такси се одвива за нив превозот до центарот за дијализа „Диаверум“, од оваа установа тврдат дека од 2014 година до денеска превозот на пациенти се одвива комбинирано со комбиња и со такси возила.

Со оглед на искуството кое го имавме во сите овие години наназад и за време на ковид пандемијата, кај такси превозниците многу често се случуваат промени и сето тоа го отежнува процесот на организација на превозот на пациентите и од компанијата која е задолжена за организација на превозот на пациенти побараме да го зголемат бројот на сопствени возила и со тоа да набават нови возила со цел да ги избегнеме проблемите кои претходно настануваа со промените кои се случуваа. Компанијата која го организира превозот го прифати истото и на крајот од 2021 набави 16 нови електрични (ecofriendly) кобиња и 5 нови комбиња. Од 2014 година до крајот на 2021 година превозот се организираше со следниот возен парк: 8-комбиња и 7 Дачија Дастер возила и остатокот до потребниот капацитет за превоз беше дополнет со такси превоз. Денеска превозот се организира со следниот возен парк: 16 електрични (ecofriendly) комбиња, 5 комбиња и 6 Дачиjа Дастер возила, а како и претходно остатокот до потребниот капацитет за превоз е дополнет со такси превоз. Значи промената настанува со воведување на нови возила од страна на превозникот кои се користат само за превезување на дијализни пациенти и ништо друго и во зголемен капацитет на превозникот кој го организира превозот на нашите пациенти, велат оттаму.

Оттаму негираат дека промената која е направена е за да се заштедат пари.

Сакаме да потенцираме дека доколку целта ни била да заштедиме пари, во тој случај ќе сме го следеле договорот со Министерството за Здравство каде што како наша обврска стои дека треба да организираме превоз на нашите пациенти од собирниот центар во секоја Општина до нашите дијализни центри. Но ние од почетокот, а и денеска превоз за нашите пациенти организираме од нивните домашни адреси до нашите центри, а не од едно место во секоја Општина, посочуваат оттаму.

Дијализниот центар Диаверум тврди дека од  март 2020 откако започна пандемијата организирал превоз со редуциран капацитет во возилата за превоз до 50 проценти со цел да се намали ризикот од ширење на вирусот. Ова било направено неколку месеци пред Владата да донесе одлука за редуциран капацитет при превоз на патници на 50 проценти. Оваа организација трала до крајот на јули 2021 година.

Превозот постепено се враќаше во нормален капацитет и повторно следејќи ја состојбата на  процент на целосно вакцинирани пациенти и состојбата со вирусот. А денеска секако посебно се организира превоз за пациенти кои се ковид позитивни или суспектни  пациенти. Сето ова повлеква дополнителни трошоци за кои ние никогаш не сме добиле дополнителен надоместок. Верувам дека ќе се согласите дека во целата ситуација не можеме да збориме за никаква заштеда, туку за зголемени трошоци и инвестиции се со цел да се подобри превозот и да се заштитат нашите пациенти, велат од Диаверум.

Оттаму додаваат дека превозот постојано се организира со комбинирани капацитети и истото ќе продолжи и понатаму, што значи дека се планира дијализните пациенти и понатаму да се превензуваат со комбиња за превоз на патници и со такси возила кои се користат да се дополни капацитетот.

-Во врска со доцнењето, потврдуваме дека во понеделникот поради воведување на софтвер за организација на превоз на пациенти кај превозникот настана проблем и тој ден имаше доцнење во превземањето на пациентите кој проблем е надминат и од вторникот и другите денови немаше такви проблеми. За овој проблем беше известено и здружението за дијализни пациенти Нефрон и исто така го известивме здружението дека проблемот е решен во вторникот наутро. Исто така беше разговарано со пациентите во нашите Центри за дијализа, при што го констатиравме проблемот и истиот беше надминат и наредните денови немаше никаков проблем. Како и секогаш остануваме посветени во грижата за нашите пациенти и се трудиме да обезбедиме најдобра услуга, а со тоа и подобрување на организацијата на превозот за нашите пациенти, посочија од дијализниот центар.