Гласната музика од клубовите и кафеаните не им дава мир на скопјани кои живеат во близина на овие објекти, особено во летните месеци. Граѓаните се жалат дека нивните семејства остануваат без сон до доцна во ноќта, дека им е нарушен спокојот и дека ненаспани и уморни одат следниот ден на работа. И сето тоа поради бучавата од кафеаните, чии сопственици ниту високите казни не ги спречуваат да ги малтретираат граѓаните.

Проблеми имаат жителите на Капиштец и Дебар Маало, на Карпош 3 поради забавите со диџеи кои се организираат на кровот на Скопје сити мол, но и оние кои живеат во близина на објектите каде на покривите функционираат ресторани што организираат прослави, па дури и свадби. Всушност, проблем имаат сите граѓани кои живеат во близина каде има поголема концентрација на угостителски објекти или само еден, но доволно гласен за да ја вознемирува целата населба.

 Од мака си се шегуваме по дома – Ајде уште невестатат да го фрли бидермаерот и можеме да легнуваме – вели скопјанка која живее во близина на катната гаража „26 Јули“ на чиј покрив се наоѓа ресторанот „Рагуза руфтоп“ со капацитет за неколку стотици гости.

Жителите што живеат на улицата Народен Фронт во Капиштец, во непосредно соседство со клубовите, рестораните и кафеаните наредени во низа, решија здружено, потпишувајќи петиција, да побараат надлежните институции да им овозможат мир во домовите во ноќните часови. Станарите во петицијата бараат засилена и ефикасна интервенција на МВР и Државниот пазарен инспекторат и на останатите институции за да им се реши проблемот со гласната музика, нарушениот ред и мир, дивеењето и отежнатиот сообраќај на делот од улицата каде се наоѓаат клубот „Интермецо“ и останатите угостителските објекти. Затоа што, освен бучавата и гласната музика, на жителите проблем им создаваат и неправилно паркираните возила пред рестораните и клубовите, иако тоа е недозволено, но никој не ги казнува.

Граѓаните „сити“ од бучните кафеани и дуќани, имаат проблем со урбаното живеење

Денеска градоначалникот на Општина Центар, Горан Герасимовски им даде целосна поддршка на граѓаните и на нивните барања изнесени во петицијата.

Ние, како Општина, ги презедовме сите правни механизми што ни се достапни! Не помогнаа ни глобите ни казните. Овој проблем треба да се реши долгорочно, а за тоа е потребна координација и притисоци од страна на сите надлежни институции, рече Герасимовски.

Општина Центар петицијата ја проследила до МВР, Министерството за економија и труд, Министерство за животна средина и просторно планирање, Државниот пазарен инспекторат и Државниот инспекторат за животна средина, и побарала да се одржи итна средба за решавање на проблемот на засегнатите станари.

На барање и поплаки на жителите за прекумерна бучава, Општина Центар во повеќе наврати го санкционираше локалот „Интермецо“ со глоби, опомени и забрани за вршење дејност. Пред една година ова кафуле, како и кафулето „Мош“, Општината ги казни, и тоа не за првпат, со казна од по 13 илјади евра поради гласна музика. Тогаш, општинската инспекција, спроведе акција за мерење бучава од прегласна музика по пријави од граѓаните низ целата општина, особено беа исконтролирани локалите за кои редовно стигнуваат пријави од граѓани, конкретно во Дебар маало, Буњаковец, Центар и Капиштец.

Скопските кафулиња „Мош“ и „Интермецо“ повторно казнети со по 13 илјади евра поради гласна музика

Општина Центар постојано добива поплаки од граѓаните за гласна музика и непочитување на работното време по што во неколку наврати досега има изречено и казни. Но, како што може да се види на терен за „непослушните“ угостотели не помагаат ниту казни, ниту постојаните апели од Општина Центар да се придржуваат до постоечките правилници и да се придржуваат до Законот за заштита од бучава во животната средина.

Од Центар велат дека и понатаму ќе продолжат со санкционирање на сите угостителски објекти кои не го почитуваат законот, но дека за долготраен успех потребна е соработка на сите надлежни институции.