Зелените пазари се наполнија, а увозниот зеленчук се повлекува, пред сè поголемите количества на домашни производи. Производителите од Струмичкиот регион имаат полни раце работа, бидејќи трговците од целата држава склучуваат договори за откуп. Има нешто и за извоз, а нашата пролетна зелка наголемо патува за Полска, која годинава ги зголеми нарачките. Единствено е дефицитарен гравот, кој речиси целосно е од увоз од Киргистан и кој во изминатиов месец беше скриен. Ретките пазарџии и покрај казните го нудат за 200 денари, иако неговиот замрзнат максимум би требало да биде 95 денари. Сè уште е рано за поголем извоз и на другите раноградинарски производи, бидејќи ова е прва берба и редно е да се даде предност за домашните потрошувачи. Блажо Витанов од „Империјал фрут“ од Струмица за „Слободен печат“ вели дека штом се појавија поголеми количества наши производи, цените почнаа да се стабилизираат и сега може да се каже дека горе-долу се пристапни за потрошувачите.

До пред некој ден и пазарите и маркетите беа речиси празни, а увозните домати и краставици држеа цени и над 200 денари за килограм. Што се однесува до овошјето, засега освен увозни портокали, банани и лимони, срамежливо се нудат и домашни јагоди, кои претпразнично чинат од 100 до 120 денари за килограм. Агроекспертите велат дека кога и ако се појават раните домашни овошки, тие ќе бидат далеку поскапи од лани, бидејќи временските услови не се добри за нив. Проблеми може да се јават кај праските, црешите, крушите и вишните, кои цутат рано, а најмалку кај малините и јаболката.

– Обемот на работа се зголемува и веќе може да се каже дека најголемиот дел од понудата е домашно производство, какви што се, на пример, краставиците. Нивната откупна цена се движи од 35 до 40 денари, а на пазарите тие се нудат по 50 или 60 денари за килограм. Ова е реална цена, но и нашите земјоделци треба да си ги наплатат трудот и маката – објаснува Витанов.

Понудата на домати пред првомајските празници сè уште е релативно скапа, оти и црвениот и розовиот се откупуваат за 90 или 100 денари, а на пазарите се нудат максимум до 120 денари за килограм. Пиперката засега е со највисока цена од 170 денари за килограм, бидејќи според Витанов, се откупува за 120 денари од производителите. Зелката оди одлично, се откупува за 25, а се продава од 35 до 40 денари, падната е и цената на младиот компир, кој сосема е изедначен со стариот и чини од 40 до 50 денари. Во моментот рекордно висока цена постигнува врзоп млад кромид, кој се цени на 25 денари, иако лани ова време се нудеа три парчиња за 20 денари.

– Почнаа да излегуваат главиците млад кромид и се надевам дека ќе падне и цената на кромидот, кој цела зима уриваше рекордно, оти беше од Холандија и од Египет и стигна да чини и 100 денари за килограм – вели Витанов.

Цените на овошјето и на зеленчукот нема да се одмрзнат од понеделник како што беше планирано. До кога ќе трае мерката, ќе се знае деновиве. Владата им објави војна на увозниците и на трговците откако јавноста збесна поради безобразно високите цени и непочитувањето на одлуките за замрзнување.

– В петок јавно ќе се започнат кривичните постапки – најави министерот за економија Крешник Бектеши. Ова се однесува на увозниците и на трговците со овошје и зеленчук, за кои инспекторите утврдиле дека не ги почитуваат владините мерки за замрзнувањето на цените. Во акцијата што се одвиваше на Кванташкиот пазар беа одземени повеќе од 15 тони овошје и зеленчук, а според министерот, прекршочни пријави заработија и управителите на Кванташкиот пазар, како и повеќе маркети.

Никогаш олку не доцнела сеидбата на пченка во регионот

Земјоделците од целиот регион со неизвесност влегуваат во пролетната сезона бидејќи сеидбата на пченка сериозно доцни. Наместа беше продолжена и повеќе од десет дена, а поради влажноста на почвата, производителите не можат да одат на нивите, пишува „Агроклуб“. Нови врнежи од дожд се предвидуваат за недела и следната седмица. И во Србија, како и во Хрватска и во Босна и Херцеговина, поради ваквата состојба се наметнуваат низа прашања, а пред сè како доцнењето поради нестабилното време ќе влијае врз идните приноси. Земјоделците се жалат дека не паметат ваква пролет во изминатите триесеттина години, пренесува српска Политика.