Доајенот на македонскиот театар и филм, уметникот кој целиот свој живот го посвети на уметноста, Коле Ангеловски е роден на 14 март 1943 година во Скопје и денеска го слави својот 82 роденден.

Животниот и творечки опус на Коле е разновиден, динамичен и плоден. Тој е македонски театарски и филмски актер, театарски и филмски сценарист и режисер на повеќе драми, серии, документарци и филмови за македонските театарски куќи, телевизиски станици од кои најмногу за МРТВ.

Филмската дејност на Коле Ангеловски е импозантна. Во 1967, ја игра и главната улога во „Македонска крвава свадба“. Истата година тој е сценарист во филмот „Патека“. Во 1969 година игра споредна улога во филмот „Време без војна“. Во 1971 година игра главна улога во филмовите „Жед“ и „Македонски дел од пеколот“. Во 1973 година тој е режисер и сценарист во филмот „Татко (Колнати сме, Ирина)”. Во 1979 година тој го режира филмот „Додека водата тивко шумоли“. Игра главни улоги во филмовите: „Оловна бригада“ (1980), „Црвениот коњ“ (1981), „Јужна патека“ (1982), „Нели ти реков“ (1984). Во 1988 година тој е режисер на филмот „Викенд на мртовци“.

Познат е и како писател, драматург, публицист и културен работник.

Како глумец првпат пред филмската камера застанал веднаш по земјотресот во детската драма „Диди и Дади“ во која толкувал една од главните улоги.

Добитник е на многу награди како глумец, режисер, истакнат културен работник, драматург, преведувач, а добитник е и на највисоката македонска награда во културата „Наградата за животно дело 11. Октомври“.