Мешовитиот комитет на ЦЕФТА усвои девет договори наменети за трансформација на трговската и економската соработка, истакнувајќи дека тие претставуваат пресвртница за економската соработка, бидејќи носат опипливи придобивки – поедноставување на деловното работење, создавање нови можности за вработување и зајакнување на заштитата на потрошувачите.

На само неколку дена пред 10-годишнината од Берлинскиот процес, ЦЕФТА прави одлучувачки чекор кон остварување на визијата за Заедничкиот регионален пазар, објави ФоНет. Врз основа на правилата и најдобрите практики на Европската Унија, овие договори ќе ги доближат пазарите на ЦЕФТА до единствениот пазар на ЕУ и ќе го отклучат потенцијалот на новиот План за раст на ЕУ, се вели во соопштението.

„Ова е значаен момент за ЦЕФТА, бидејќи се приближуваме до целосно усогласување со пазарот на ЕУ. Придобивките ќе се почувствуваат низ ЦЕФТА. Малите и средни претпријатија ќе добијат овластување за извоз и максимално искористување на дигиталните пазари, а сите ние ќе имаме корист од поголем избор, подобри цени и квалитет, како и посилна заштита на потрошувачите“, рече в.д. Данијела Гачевиќ, директор на Секретаријатот на ЦЕФТА.

Клучните точки од деветте договори се однесуваат на признавањето на програмата ОЕО, односно побрзи и поефикасни царински постапки, олеснување на е-трговијата, испорака на пакети, спречување на неоправдано геоблокирање, трговски аспекти на правата на интелектуална сопственост, воспоставување на електронски систем за управување со ризици, олеснување на трговијата со услуги на туристички агенции и тур-оператори, механизам за решавање спорови и олеснување на осигурувањето од одговорност од трети лица кај моторните возила.