Економистот Бранимир Јовановиќ од Виенскиот институт вечерва во „Отворено“ на ТВ 24 рече дека царините за Кина и Канада кои ги најави Доналд Трамп се закани кои американскиот претседател ќе ги користи за остварување на дополнителни цели. Според него, иако се очекуваше дека ќе ги воведе веднаш штом ќе седне на претседателската фотелја, сепак нејасно и неочекувано е кога тие ќе станат официјални.

„Неизвесно е кога ќе ги воведе царините и најверојатно на нив гледа како закана или оружје за освојување на повисоки цели. Ако ги прашате економистите како ќе влијаат овие царини на економијата ќе ви кажат дека овие царини ќе влијаат негативно. Ќе ја забават економијата, ќе ја зголемат невработеноста и ќе направи инфлација. Ако ги прашате банкарите ќе ви кажат дека Трамп е добар за нив а тоа е виде и на инаугурацијата бидејќи таму беа и најголемите бизнисмени и банкари“, изјави Јовановиќ и додаде дека Трамп ќе биде добар само за богатите, а не и за работничката класа.

Тој рече дека за почеток очекува Трамп да воведе некакви поблаги царини со цел да види како би реагирале земјите кон кои се воведени. Според него, незивесно е и дали прво ќе се воведат царините за ЕУ или Кина.

„Она што гледам до сега е дека ЕУ му праќа знаци на Трамп и му покажува дека сака да се договори, додека пак Кина мудро молчи. Кон Кина Трамп воведе царини и во текот на првиот мандат, но Кина не беше толку погодена, така што и ако овој пат воведе царини, Кина повторно нема да биде многу ефектирана бидејќи таа сега е отворена кон други пазари. Мислам дека поголеми се шансите да воведе царини кон ЕУ за почеток“, додаде Јовановиќ.

За тоа какво влијание би имале ваквите дополнителни давачки во Македонија, тој појасни дека како и секоја друга балканска економија, и македонската би имала големи последици. Јовановиќ смета дека за да се заштити економијата од негативните ефекти, потребно е да се смени економскиот пазар и државата да се отвори и кон други пазари.