Почетокот на денешната седница на Народното собрание ќе биде прилично неплоден. Сите ќе се повлечат и никој нема да предложи кандидатура за претседател на Народното собрание. Изборот на претседател најверојатно ќе пропадне, со што опозицијата има за цел да покаже дека тие што се на власт немаат мнозинство и се слаби, анализира пратеникот и заменик претседател на Народното Собрание Атанас Атанасов од редовите на Демократска Бугарија.

Според пратеникот, неговата партија Демократска Бугарија не разговарала за нивната кандидатура за претседател на парламентот.

Тој во гостувањето на БНТ  ја коментираше и вчерашната дебата во бугарскиот парламент која треба да финишира со гласање за недоверба на владата на Кирил Петков кое го иницираше опозициската партија ГЕРБ.

Инаку, клучното гласање на вонредната седница на Парламентот за опстанок на владата на Петков е закажано за денеска во 19.10 часот по бугарско време. На Петков и неговата партија „Продолжуваме со промената“ му се потреби 121 глас од вкупно 240-те пратеници во Народното Собрание. Притисната од внатрешни проблеми предизвикани и од светската економска и енергетска криза, тешкото справување со корупцијата, инфлацијата но и преговорите со РСМ беа причина минатата недела од владината коалиција да се повлече ИТН, по што Петков остана со 109 пратеници и во неизвесност пред гласањето за доверба.

-Во Има таков народ се зборува само за пари, што доведе до многу сериозни сомнежи за намерни корупциски шеми, кои беа спречени од премиерот и министерот за финансии, што го налути ИТН, рече Атанасов.

Генералот Атанасов смета дека темата за Северна Македонија е измислена тема која на ИТН би му послужила „како завеса за покривање на нивните апетити за пари“. Според него, Кремљ е најзадоволен од она што се случува на темата Северна Македонија, бидејќи им успева планот за дестабилизација на регионот.

Атанасов рече дека го предупредил Петков дека ако не ги стави под контрола службите за безбедност, ќе дојде моментот кога тие ќе го контролираат. Тој рече дека Министерството за надворешни работи „врие од претставници на специјалните служби“.

Тој рече и дека го прочитал меморандумот на министерката за надворешни работи Теодора Генчовска од средбата на премиерот Кирил Петков со еврокомесарот за проширување Оливер Вархеји и смета дека од документот Генчовска требало да биде тргната назнаката „таен“ зошто внатре нема ништо посебно интересно.

„Внатре пишува дека премиерот, разговарајќи со комесарот Вархеји, се обврзал да создаде услови во Бугарија да се укине ветото за почеток на преговорите“, рече Атанасов, додавајќи дека индикативно е што овој предлог е доставен и до шефовите на сите безбедносните служби на државата, што е спротивно на принципите за работа – разузнавачките и контраразузнавачките служби имаа улога да прибираат информации за да фунционира владата и тука гледа скандал – дека службите го следат премиерот.

Според него францускиот предлог е добар и треба да се прифати.

-Ние успеавме зошто условите на Бугарија за кревање на ветото за започнување на преговорите на РСМ со Европската унија станаа услови на Европската унија. Македонија ќе преговара со Европската унија за бугарските услови, тоа е апсолутна победа. Ако сме разумни до петок може да се заврши целата работа и ако тоа не се случи ќе изгубиме шанса Бугарија да издвојува таква победа, рече Атанасов наведувајќи дека денеска попладне Комисијата за надворешна политика на бугарскиот Парламент треба да одржи седница на која ќе биде разгледан „францускиот предлог“ за деблокирање на евроинтегративниот процес на Северна Македонија.