Од минатиот понеделник, компанијата РИНУАБЛ ПАУЕР ИНТЕРНАТИОНАЛ, ДООЕЛ Скопје поседува лиценца за трговија со електрична енергија, доделена од РКЕ во пандемиски услови односно без подготвителна седница, а нејзин сопственик е бугарски бизнисмен кој има транспортна фирма, пишува Код.

Владата минатата недела донесе одлука за утврдување статус на стратешки инвестициски проект на фирмата Ринуабл, за таа да гради соларна централа со капацитет од 85 мегавати и објави дека оваа фирма ќе вложи 63 милиони евра во проектот. На истата седница, одлука за стратешки инвестициски проект во своето портфолио впиша и уште една фирма ХЕК СОЛАР МК ДООЕЛ Скопје. Таа фирма треба да вложи 53 милиони евра во фотонапонска електрана со јачина од 70 мегавати.

Владата ги изгласа одлуките, а двете различни фирми имаат многу заеднички работи – сопственици им се бугарски политичари, а седиштето на двете различни фирми им е на исто место, во скопската населба Кисела Вода, на улица „Кире Крстевски“ број 33-1.

„Кога бевме на адресата каде се заведени двајца странски стратешки инвеститори, не дочекаа спуштени ролетни и завеси на местото на канцеларијата и никој не отвори“, се вели во сторијата на Код.

Павел Валнев е сопственик и управител на фирмата РИНУАБЛ ПАУЕР ИНТЕРНАТИОНАЛ, ДООЕЛ Скопје. Валнев е американски Бугарин или бугарски Американец. Неговата семејна фирма во Илиноис, АмериФрајт, работи 15 години и се занимава со логистика и транспорт за што работи со повеќе од 500 камиони и тешки моторни возила. На крајот на 2020-тата Валнев влегува во бугарската политика како потпретседател на партијата Републиканци, формирана од Цветан Цветанов, некогашниот сојузник на Бојко Борисов, кого подоцна го обвинуваше за корупција.
Валнев точно пред една година заедно со лидерот на Републиканците Цветанов напиша колумна во „Дипломатик Куриер“, во која остро ја критикуваат одлуката на владата на Борисов да ја блокира Македонија на патот кон ЕУ, наместо Бугарија да покаже лидерство на Балканот.

На почетокот на својата бугарска политичка кариера Валнев донираше милион долари за партијата која на изборите во март освојува 40-тина илјади гласови или едвај нешто над 1 процент. Во јуни оваа година си поднесува оставка од местото потпретседател во партијата Републиканци, но во промотивниот политички спот на неговиот фејсбук-профил тој тврди дека има инвестиции во енергетика во Македонија и дека досега тука инвестирал 100 милиони долари.

Но, бизнисменот Валнев го има само во енергетската фирма од Кисела Вода и во кочански Хипотерм, што всушност е фирма за производство на марихуана, каде тој е влезен во 2019-та година, пишува Код. Во овие две фирми нема ниту еден вработен. Преку Хипотерм има влез во исто така кочанска фирма со деветмина вработени- Тетра хип – која исто така е во бизнисот со марихуана. Во Бугарија, пак, бизнисменот има три компании, од кои ниту една поврзана со енергија – Валнев имал телевизија која ја згаснал пред три години, наводно поради закани и притисоци од владата на Бојко Борисов.

Основач на втората фирма која ќе гради соларни електрани во земјава, ХЕК СОЛАР МК ДООЕЛ, која е регистрирана на истата адреса во Кисела Вода, е Владимир Табутов, кој е нов пратеник во бугарскиот парламент од Благоевград и тоа од редовите на победничката „Промените продолжуваат“ која ја предводи новата бугарска влада, се вели во сторијата на „Код“.