Бугарија предлага нацрт-договор со Македонија за изградба на граничниот железнички тунел од Коридорот 8 и според БГНЕС, тие се подготвени што поскоро да ги започнат преговорите за предложените текстови, а потоа да следува и негово потпишување.
Како што наведуваат тамошните медиуми, бугарската влада испратила до Македонија нацрт-договор за подготовка, изградба и работа на прекуграничен железнички тунел кој ги поврзува двете земји.

Предлогот на бугарската држава е двете влади да преземат конкретни и јасни заложби за реализација на тунелот, кој е клучен елемент на Коридорот 8, соопштиле за БГНЕС од Министерството за транспорт. Двете земји треба да се договорат која од нив ќе одговара за изградба на прекуграничниот објект, за јавни набавки и за надзор на градба, објави Дојче Веле.

Очекувањата на Софија се дека со потпишувањето на документот подготвен од Министерството за транспорт и врски ќе се договорат техничките, финансиските, правните и организациските прашања поврзани со изградбата на тунелот треба да биде во согласност со европското и националното законодавство на двете земји.
Планирано е управителите на железницата на двете земји да создадат заеднички работни групи за да ја подготват потребната документација за тендерските постапки и во рок од три месеци од стапувањето во сила на договорот, да ги испратат до Европската комисија и финансиските институции заеднички распоред за реализација на изградбата.

„Двете страни ќе вложат максимални напори да обезбедат грант помош за изградба на објектот и неговата соседна железничка инфраструктура, во согласност со барањата на ЕУ и НАТО во однос на стандардите на Трансевропската транспортна мрежа (TЕН-T)“, се наведува во нацрт-договорот.