Бугарските власти воведоа дезинфекција на сите гранични пунктови за автомобили поради комплицираната епидемиска состојба, главно во Грција и Романија. Мерката е неопходна и поради многуте регистрирани болести на чума кај малите преживари, објави БГНЕС.

Според агенцијата, надлежните по дипломатски пат веќе ги информирале соседните земји за мерката, а дезинфекцијата ќе биде бесплатна сѐ додека е во тек дипломатската координација. Инаку, во Бугарија засега нема регистриран случај на болеста, која не е опасна за луѓето.

Македонската Агенција за храна и ветеринарство пред неколку дена забрани увоз и транзит на живи животни (домашни и диви овци и кози), производи и нуспроизводи од животинско потекло од регионот Тулчеа во Романија и регионот Трикала во Грција. Ваквата одлука доаѓа поради зачувување на статусот на Македонија како земја слободна од болеста чума кај мали преживари и извоз на живи животни, месо од овци и кози и нивни производи во Европската Унија и заштита од внесување на вирусот на чума кај малите преживари.

– Увозот на производи од месо од домашни и диви овци и кози е дозволен доколку истите биле подложени на термички третман согласно донесеното решение од страна на директорот на Агенцијата за обработка во херметички затворен контејнер, термички третман што обезбедува постигнување на температура од најмалку 70°Ц – 80°Ц што треба да помине низ производот од месо во текот на преработката на месото. Исто така задолжително е термичко третирање на производите од месо, во херметички затворени контејнери на температура од најмалку 60°Ц за период од најмалку 4 часа и термички третман што обезбедува постигнување на температура од најмалку 65°Ц во внатрешноста на производот за периодот што е неопходен за постигнување вредност на пастеризација еднаква или поголема од 40°Ц – потсетуваат од АХВ.