Бугарија одлучи да го прошири производството на нуклеарна енергија како алтернатива на фосилните горива и најави изградба на два дополнителни реактори во единствената нуклеарна централа во земјата.

Двата нови реактори, кои ќе обезбедат вкупно 2.300 мегавати, ќе користат технологија на американската компанија Вестингхаус електрик, соопшти бугарската влада.

Претходно оваа година, производителот на нуклеарна опрема потпиша договор со бугарската нуклеарна централа Козлодуј за инсталирање на една или две единици на реактор за вода под притисок АП1000.

Бугарскиот премиер Николај Денков денеска изјави дека Владата одвоила 250 милиони евра за проектот и додаде дека првиот реактор треба да биде готов за пуштање во 2033 година, а вториот две до три години подоцна.

Бугарија во моментов користи два руски реактори ВВЕР-1000 од по 1.000 мегавати во нуклеарната централа Козлодуј, кои произведуваат околу една третина од електричната енергија во земјата.

Нивните лиценци за работа истекуваат во 2027 и 2029 година, но тие би можеле да бидат во функција подоцна доколку регулаторот одобри.

Во 2006 година Бугарија мораше да затвори четири постари реактори ВВЕР-440 како услов за влез во Европската унија, но Денков сега изјави дека вкупниот капацитет на новите блокови значително ќе го надмине нивниот капацитет од 1.760 мегавати.

По почетокот на руската инвазија на Украина, Бугарија презеде чекори за ослободување од нејзината речиси целосна енергетска зависност од Москва. Како дел од напорите за диверзификација на изворите на енергија, минатата година Бугарија потпиша договори со француската компанија Фрамат и американската Вестингхаус за добивање свежо нуклеарно гориво за оперативните реактори.