Ако сте заборавиле да купите леб, можете да ги направите овие брзи неверојатни погачици со само три главни состојки. Може да се јадат во солена варијанта но и во комбинација со џем или нутела.

Состојки

2 јајца

300 мл јогурт

600 грама обично бело брашно

1 лажичка сол

1 кесичка прашок за печиво

Подготовка

1. Тесто

Јајцата изматете ги со жица за матење, па додајте ги јогуртот и солта и убаво изматете. Додадете го брашното и прашокот за печиво и сè убаво измешајте додека не добиете смеса што не се лепи за раце.

На набрашнета површина развлечете го тестото со дебелина на прст и исечете го на помали парчиња. По желба можете да ја засечете средината и да ги оформите.

2. Печење

Во тавче сипете масло, а кога ќе се загрее на средна температура ставете ги подготвените парчиња тесто. Печете неколку минути од секоја страна да поруменат.

Доколку ги печете во фритеза на топол воздух, ставете ги на хартија за печење и печете ги 6 до 8 минути. На половина од печењето можете и да ги превртите.