Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

– Го сакам секој дел од процесот, но најмногу уживам во фотографирањето на храната ни открива – Дијана.

Инвентивната Дијана денеска споделува рецепт за едно гастрономско уживање – мини чискејк со јагода и бела чоколада.

Потребни состојки:

За кората:

– 200 г мелени бисквити
– 100 г растопен путер

За кремастиот дел:

– 300 г крем-сирење
– 110 г шеќер
– 300 мл слатка павлака
– 1 ќесичка желатин
– 4 лажици вода (за желатинот)
– 200 г јагоди или малини
– 150 г бела чоколада

За декорација:

– Слатка павлака (по избор)

– Од оваа количина ми излегоа 6 мини чискејкс во силиконски калап и еден во класичен калап од 20 см – вели Дијана.

Подготовка:

Во еден сад измешајте ги бисквитите и стопениот путер. Ќе добиете смеса слична на влажен песок. Распределете ја смесата во калапите и натапкајте ја убаво на дното.

Стопете ја чоколадата. Желатинот измешајте го со ладната вода и оставете да набабри околу десет минути. Потоа стопете го на тивок оган, не треба да проврие само да се стопи. Изматете го крем-сирењето со шеќерот. Додајте го желатинот, чоколадата и слатката павлака. Матете околу пет минути.

Кратко изблендирајте ги или исечкајте ги јагодите. Додајте ги во смесата и нежно измешајте, но не целосно, нека останат и бели делови.

Распределете ја смесата врз базата од бисквити. Измазнете ја површината и ставете ги во фрижидер неколку часови да се стегнат.

По желба, декорирајте го добиениот десерт со изматена слатка павлака, јагоди, прелив.

На здравје!